МЕНӦ САДЬМӦДІСНЫ ТУРИЯС
Некод оз помнит, кор сиктбердса нюрӧ пуксьыліс медводдза тури: поздысян ин сьӧкыд туй бӧрын сюри войтырыс вӧліны бурӧсь. Сэсся быд тулыс, му мездмас кор лымйысь, волісны лунвывса гӧстьяс. Тан мудзӧм гозъяӧс вӧр-валӧн сывъяс Шондіыс козьнавліс пӧсьнас. Пӧльясӧс садьмӧдліс турилӧн горзӧм, чуксасян рам сьыланкывйыс. Коді нӧ налысьсӧ сьылӧм да ворсӧм сиктса йӧз лыдысь эз кывлы? Некод эз тувччывлы нюрланьыс кокӧн, дзоридзӧн мичмӧ кор озйыд. Ӧлӧдліс вок ассьыс ичӧтджык вокӧс, медым оз мун тури позлань. Вичко кӧ повзьӧдліс жыннянъяс шынас вӧр-валысь кокньыдик унсӧ, — ланьтліс и жыннян... И лӧнь лоліс кыа, кыпӧдчис кымӧртӧм лун тшӧтш. Колисны нэмъяс... Дзор пӧльяслӧн пиян тӧдісны вӧр-валысь донсӧ. Некод оз лэдзлывлы гожӧмнад кисьыс нюрланьыс ветлыны понсӧ. Чужи ме, лэбач моз бордъяси сиктын. Муртса и югдыштіс сямӧй, потанын куйлігӧн, ӧшиньӧд ликтіс нюрвывса гӧстьяслань мамӧй. Тӧд вылысь унатор вошис да бырис, вушйӧ кыдз чусмыштӧм пасыд, сӧмын эз быгавлы зіль челядьдырӧй, туриӧн чуксасьысь асыв. Тӧда, и зонъяс тшӧтш, кодъяслӧн ори олӧмныс вӧрӧгкӧд тышын, кылісны, мый вӧлі быд горысь гора — нюрвывса олысьлӧн шыыс. Унаысь вежлісны пӧльясӧс пиян — нюжалӧ войтырлӧн рӧдыд. Пинад жӧ шуӧны сойыд ӧд сійӧс, чужанін коді пыр тӧдӧ. Миян кӧ челядьным быдмисны айтӧг, велӧдны, дерт, колӧ овны... Та йылысь мудзлывтӧг аслыным кайтны талун и аски на ковмас. Вель уна во чужан сиктӧ эг волы, дзормыны ачым нин понді. Унаысь сиктнымӧс лымйӧн жӧ толіс, шонтыліс тувсовъя шонді. Тулыс и ӧні, но асывлань чӧвлун вежӧма мукӧд шы важӧн... Мыйла нӧ, муса гӧсть, сідз, кыдз тай вӧвлі, миянӧс талун он гажӧд? Лыйисны турилысь пӧдруга-пӧвсӧ поз вылас пиянсӧ пӧжиг... Сылӧн пӧсь сьӧлӧмас лӧглунсӧ чӧвтны лёк мортыд яндысьтӧг чӧжис. Кыпӧдчис енэжӧ ранитчӧм ёртыс, кымӧръяс чукӧрӧ вошис. Гашкӧ, и мӧд кодкӧ лунвывса гӧстьлысь пищальӧн туй визьсӧ потшис. Комын во Туриӧс некутшӧм ловъя нюр весьтсьыс эз пӧ нин аддзыв. Мырпом ни турипув сідзжӧ оз овлы, — Йӧз мыжысь налы тшӧтш яндзим.
Гижӧд
Менӧ садьмӧдісны турияс
Жанр: 

lkejrlkelkrgner klrjnelknfrkl ekjnrjkenfrej

1