БОРДЪЯ ЗОНЪЯС
Тайӧ лои ылі вӧрын, Миян Коми парма шӧрын, Кӧні абу сикт ни кар. Луныс вӧлі ёна жар, Шонді нем жалиттӧг пӧжис, Гулыд ягысь, Щугӧр кӧджысь Бокӧ вешйис сьӧла-тар, Зверь и лэбач пышйис ылӧ, Билӧн гырд кыв пуяс йылысь Нювны горша кутіс кор Сира лыс и кыдз пу кор. Сійӧ, коді лэдзис бисӧ, Эз коль сэтчӧ ассьыс кисӧ, Гашкӧ, ӧзйысь истӧг тув Вувзис ягас; косьмӧм ув Трачкакывны пыр жӧ кутіс, Биыс змей моз кыссис муті, Асъя лысваысь эз кув; Сэсся лэптіс юрсӧ вывлань, Пашкыр сус пуяслӧн сывйын Лоис наян да зэв яр, Гожся шондісьыс на жар. Ягӧ биыд друг кӧ пырас, Он зэв ӧдйӧ сійӧс бырӧд, Сэтшӧм сылӧн ышман вын; Би, а сыкӧд курыд тшын Мӧдӧдчасны водзӧ туйӧ, Вуджасны збой ёльяс, юяс, Наысь зверь-пӧтка оз мын... Бура тӧдам: важся кадӧ Кымын раслы, кымын яглы Бисьыд коркӧ воліс пом... Вывті азым сылӧн вом! Щугӧр юбердса кордонын Оліс-выліс уна во нин Вӧрсӧ дӧзьӧритысь морт, Миян вӧр-валӧн бур ёрт. Тані лесникаліс сійӧ, Быдтіс ассьыс ӧтка пиӧс. Быд лун ичӧтик Егор Аслас айкӧд ветліс вӧрӧ, Кӧні олӧ ыджыд йӧра, Быдмӧ сус пу, пожӧм, коз, Но и, дерт жӧ, чӧскыд оз. Буретш тайӧ зэв жар лунӧ Щугӧр сайӧ ӧтнас муніс Чӧскыд озла ичӧт зон, Сыкӧд вӧтчис Катшыс пон, Но Егор зэв стрӧга шуис: — Ягӧ тэныд пӧдса туйыс, Кӧть и синмыд биа-дон. Пӧтка пиянӧс эн повзьӧд, Пыр жӧ кос вай аслад позъяд, Ӧтнам мунны ме ог пов... Шыть тэ! — Катшыс, тэ он ков! Озйыс вывті уна вӧлі Быдмӧ матыс вӧр ді пӧлӧн, Кыкнан синтӧ, колӧк, кунь, Вотӧс корсяс тэрыб чунь. Ыджыд доз тыр Егор вотіс, Мудзис, дӧзмис, сэсся вот и Кутіс личкыны нин ун... Буретш сэки... Мый нӧ тайӧ? Аддзис орчча вӧр ді сайысь Ичӧт зон, лесниклӧн пи, Пуяс костӧд кыссьыс би. Этша вӧлі шӧйӧвошны... Кыдзи билы туйсӧ потшны? Абу кӧ на вывті сёр, Котӧрт ай дінад, Егор! Тадзи-й ставыс лои тайӧ... Вуджис Щугӧр: — Айӧй, айӧй!.. Зонлӧн лов шы чуть эз ор: — Лёк би сус пуястӧ сёйӧ, Курыд тшынӧн сэсянь койӧ!.. Айыс босьтіс чер да зыр: — Налы паныд мунам пыр!.. Вӧрыс кос да вывті тшӧкыд, Бикӧд водзсасьны зэв сьӧкыд, Колӧ отсӧг... Воас кысь!.. Весиг мӧвпыштны он лысьт: Медся матыс сикт зэв ылын, Ӧтнас, кылӧ, кышакылӧ Кокъяс улын косьмӧм лыс... Шуӧ айыс: — Мун кордонад, Юӧрт, пиӧй, телефонӧн, Мед пӧжарнӧй самолёт Сыктывкарысь воас... Вот... Ачым, дерт, ог кут ме узьны, Бикӧд тышын оз позь мудзны. — Сэк жӧ бара пырысь-пыр Босьтіс киас паськыд зыр. Зонлы эз ков мӧдысь тшӧктӧм, — Пыжсӧ зібйӧн ӧдйӧ йӧткис, Айлы кыв ни джын эз шу, Ӧдйӧ вуджис Щугӧр ю. Пырис гортас. Пызан помысь Босьтіс трубка телефонлысь, Кодкӧ шыасис: — Ду... ду... Егор воча: — Дуду, чолӧм, Сыктывкарыд меным колӧ... Коді ме? Лесниклӧн пи... Миян ягӧ пырис би!.. Эз дзонь лун да ещӧ лун джын, — Коли часысь, гашкӧ, унджык, Щугӧр весьтысь журган шы Сӧмын пельтӧм морт эз кыв. Самолёт — эз ӧти, куим! — Татчӧ вайис кымӧр туйӧд Ассьыс гора сьыланкыв. Найӧ гижталісны кытшӧн Небесалысь сӧстӧм кышӧд Сэсся, — шензьыны кӧть кут! — Воссис ӧкмыс парашют. Уна рӧма ӧкмыс дзоридз Самолётъяс бердысь ори, Сэсся аддзис чуймӧм зон Кыдзи воссис ӧкмыс вон. Ставыс лои ӧти здукӧн, — Бордъя йӧзлӧн быдса чукӧр Пуксис муӧ... Эскан он! Бордъя войтыр смелӧсь, збойӧсь, Дасьӧсь, ковмас кӧ, и войын Вуджны парма, лыдтӧм ю, Медым видзны чужан му. Асьсӧ Егор эз жӧ янӧд, Воӧм йӧзлы тӧвзис паныд: — Сотчӧ миян Щугӧр сай... Сэні ӧтнас менам ай!.. — Отсӧг вылӧ ми и воим!.. Бур, мый тэ тшӧтш тані лоин, — Шуис ӧти. — Нуӧд вай!.. Ми ог черӧн да куш зырйӧн Бертны кутам ӧзйысь мыръяс, — Биыс водзӧ мед оз уй, Аммоналӧн вундам туй. Вуджисны кор Щугӧр сайӧ, Аддзисны Егорлысь айсӧ: Сійӧс кытшаліс нин тшын, Сійӧс эновтіс нин вын Бикӧд водзсасян ён тышас... Дерт жӧ, уджаліс кӧ дыша, Весиг юр доннас эз мын! Но салдатъяс моз жӧ стройӧн Бордъя йӧз пырисны бойӧ, Пасьйис билысь азым сыв Сійӧс пӧдтысь уна взрыв. Вот и ставыс ягын лӧнис... — А детинкаыс нӧ кӧні?.. — Шайпаймуніс медзбой зон, Пӧрччис лӧз комбинезон. Корсьны Егорӧс эз ковмы, Сійӧ вӧлі мудз, но ловъя, Сӧмын саӧсь ныр и вом. — Шуда кодзув улын чужин!.. — Ошкис бордъя зонмыс. — Кужин Ӧдйӧ корсьны Сыктывкар... Лоан тэ лесник зэв яр! Мыйла, Егор, лоин жугыль, Кыдзи йиӧн дорӧм Щугӧр, Мыйла мулань лэдзин юр! — Быд удж, Егор, овлӧ бур!.. — Тайӧс сійӧ ӧні шуис Парашютсӧ коді нуис, Кыдзи сус коль нуӧ ур. Егор ун йывсянь моз ловзис: — Он кӧть эскӧй... Ог, ог повзьы!.. Менам некыті оз ор, Биӧ уськӧдча, кӧть кор... Лоа быть парашютистӧн!.. Серам ӧзтіс сылӧн висьтыс, Но збой йӧзлӧн командир Кисӧ зонлы мыччис: — Мир!.. Медым тэнӧ шог оз йир, Он кӧ сьӧлӧмад видз полӧм, Сёысь кымӧр саяд волан, Медводз аддзан шонді дзирд, Кутан смела видзны, пиӧй, Муса парматӧ лёк биысь, Ассьыд енэж, ассьыд ю, Дерт жӧ, став сӧветскӧй му!.. Щугӧр весьтад зарни шонді — Медым дзирдавны век пондас Да пыр шуда лоас морт, — Тэныд — варышысь ён борд. Кывсьӧ, ылі Щугӧр сайын Мырсьӧ пыр Егорлӧн айыс, Вӧр-ва дӧзьӧритысь ёрт. Кӧні зонмыс! Сійӧ миян Повтӧм сьӧлӧма, бур пиян. — Гӧрӧ енэжлысь лӧз от, Бордъя, кыдз и самолёт.
Гижӧд
Бордъя зонъяс
Жанр: 

lkejrlkelkrgner klrjnelknfrkl ekjnrjkenfrej

1