ШОГСЬЫСЬ НЫВ

Кор вӧлі ме кызь арӧса,
Ме вывті вӧлі збой.
Важ керкаӧ, лёк керкаӧ
Ме ветлывлі быд вой.

Ме мыйла сэтчӧ ветлывлі?
Сэн оліс мича ныв.
Эз некор сійӧ гажӧдчы,
Эз серав ни эз сьыв.

Пыр пукаліс, пыр думайтіс...
Мый думайтіс — ог тӧд.
Пыр сійӧ менӧ юаліс:
«Тэ туйӧ он на мӧд?

Вай мунам татысь ылӧджык:
Мем ёна тані шог...
Лёк йӧз вылӧ эн видзӧд тэ,
Лёк йӧзлы кутшӧм мог?»

Ме бурӧдлі, ме шуавлі:
«Эн жугыльтчы, бур ань,
Эн шогсьы нинӧм абуысь,
Сідз овны абу шань.

Эн думайт татысь пышйыны,
Ас гортад лучше ов,
Дай любит менӧ ёнджыка,
Да некодысь эн пов!»

Бур ныв мем воча шуаліс:
«Эн лӧгась, муса зон!
Ме ёна тэнӧ любита,
Ме тӧда тэнсьыд дон.

Тэ менам югыд шондіӧй,
Тэ менам сьӧлӧмшӧр...
Ог вермы шогӧс бурӧдны,
Кӧть мый тэ менӧ кер!»

Ме бара сійӧс бурӧді:
«Эн жугыльтчы, эн бӧрд,
Эн косьты ассьыд сьӧлӧмтӧ!
Том сьӧлӧм абу кӧрт!»

Ме мича нылӧс окалі...
Пыр шогсьӧ мича ныв:
Оз гажӧдчы, оз серавлы,
Оз сьывлы сьыланкыв.

Ме синва киссьӧм аддзывлі
Важ керкаын быд вой.
Ме ачым сэсся жугыльтчи,
Ме ачым эг ло збой.