***

Сыктывкар, ул. Ленина, 40, кв. 10. Щербакову Ф. В.

Видза олан, Эдуард Ганс!

Бара кӧсъя кыв-мӧд гижыштны тэныд. Юхнин ёрт мен предложитліс лыддьыны ассьыс «Дінъёльса вӧрпунктӧ» повестьсӧ. Тарыт ме лыдди. Колӧ шуны веськыда: ме эг надейтчыв первойсӧ, мый сійӧ сетас меным кутшӧмкӧ впечатление. Книга ним сертиыс (коді сӧвсем абу удачнӧй) ме думайтлі, мый Юхнинлӧн повестьыс прӧстӧй очерк сяма, шаблоннӧй да с.в. Збыль вылӧ Юхнин гижӧма лыддьыны туяна гижӧд, весиг зэв бур повесть, коді вермӧ лыддьысьӧс заинтересуйтны. Позьӧ шуны, мый Коми прозаын ӧнӧдз татшӧм гижӧдыс эз на вӧвлы. Дерт, бӧрйысьны кӧ, сюрасны зэв уна тырмытӧмторъяс. Например, ньӧти геройлысь абу помӧдз петкӧдлӧма характерсӧ; найӧ кажитчӧны ставныс ӧтик чужӧмаӧсь, ӧтик паськӧмаӧсь, сӧмын мукӧд дырйи вӧчалӧны разнӧй действиеяс; медся нин омӧля обоснуйтӧма сэтшӧм человеческӧй торъяс, кыдз Дунялӧн Свежов Гриша сайӧ мунӧм, а сідзжӧ Микитлӧн Клашакӧд радейтчӧм; тайӧторъяссӧ абу колана ногӧн конкретизируйтӧма да сы вӧсна кажитчӧ неногаӧн; сідзжӧ абу реальнӧй — Пӧчинокса Прокопей сэки, кор сійӧ лэччӧ сиктӧ да медводдзаысь аддзӧ колхоз, тракторъяс, шуда олӧм, да пырысь-пыр жӧ сійӧ сьӧлӧмын артмӧ перелом; повестьысь он гӧгӧрво, кӧні да коді сэн центральнӧй фигураыс. Микит? Оз запоминайтчы, сы вӧсна, мый быттьӧ кажитчӧ, сылысь рольсӧ петкӧдлӧма неуна вуаль сайын. Врач Асныров? Тожӧ оз веритсьы, кыдзи оз веритсьы и Свежов, Дуня, Чугун Ӧльӧш да с.в. Тан центральнӧй фигураыс абу. Сы вӧсна, мый Юхнин ставсӧ кӧсйӧма петкӧдлыны ӧткодя, лыддьысьлӧн быд герой дінӧ интересыс ӧткодь; впечатлениеыс геройясысь дзоньнас стушуйтчӧ. Век жӧ, ме ногысь, «Дінъёльса вӧрпункт» — тӧдчана произведение, код вылысь позьӧ босьтны пример став прозаикъяслы, дажӧ важджыкъяслы на. Ме ог тӧд, кутшӧм тэнад мнениеыд, но ме ассьым висьталі.

Ме ӧні ачым немтор ог гиж, эштытӧм вӧсна. Положениеыс миян туйяс вылын вывті критическӧй, медся нин ӧні, тувсов кадӧ. Рӧспута ради настроение вывті омӧль, кӧть ваӧ пырав. Став туй полотно разрушитчис помӧдз. Восстановитӧм вылӧ колӧ бур поводдя да геркулесовскӧй усилие.

Менам сӧвет тэныд, Фёдор Васильевич, шыбитны ассьыд поэтическӧй псевдонимтӧ — «Эдуард Ганс». Тэ сійӧс буракӧ «по наследству» босьтӧмыд ӧтик важ немецкӧй юристлысь, коді специализируйтчылӧма наследственнӧй правояс вылын. Сійӧс тожӧ нимтылӧмаӧсь Эдуард Гансӧн. Мен буракӧ тожӧ лоӧ вежны ли мый ли, а то кутшӧмкӧ «сукин сын» менам ним улын печатайтӧма «Коми комсомолец» газетын (14 апр.) кывбур «Тулыс» либӧ «Тулысын». Если кӧ тайӧ кывбурыслӧн авторыс кутшӧмкӧ том заводитчысь, позьӧ шуны, мый тайӧ кывбурыс абу омӧль, ӧткымынлаті вывті лӧсьыд, и та понда сійӧ мортыс вылӧ некутшӧм претензия ог кут имеитны, мед бласлӧвеся гижӧ А. Размыслов ним улын. Дерт, ӧд сійӧ кӧнкӧ абу Ананий Размыслов, а мыйкӧ мӧдногаджык.

Май тӧлысяс, тыдалӧ, коркӧ удайтчылас волыны Сыктывкарӧ. Сэк буракӧ и аддзысьлам.

Вот и став. Сиа бур настроение да стихъяс.

Тэнад друг

Ананий Размыслов.

с. Объячево, 1939 во, апр. 27 лун.