СЕМӦ ПӦЛЬ КУВСЬӦМЫСЬ ЭНОВТЧИС

Семӧ пӧльным збыльысь висьмис,
Эз кут узьны вой,
Тӧдчӧ, бура кодь нин кисьмис
Кос зэлӧдан дой.
А кор унмыд пышйӧ ылӧ,
Косьмыштӧ тшӧтш вом,
Медводз сьӧлӧмыд тай кылӧ,
Матысмӧ кыдз пом.
Сідзкӧ, арталыштны колӧ, —
Эм сы вылӧ кад:
Ельцин серти мый дон сувтӧ
Медбӧръя «парад»...
Горттӧ сюрс шайтысь оз вӧчны,
Корасны сё-мӧд,
Гу кодйысьлы муса пӧчыд
Оз этшаджык лӧд...
Ковмас омӧлик да кресттор,
Бара сет сюрс шайт,
Весиг горт вомӧналан кык зыр
Донтӧг некод жӧ оз вай.
Казьтывнытӧ вина юысь
Локтас кыдз сьӧд гут...
Енмӧй, — тэныд ӧд ме шуа:
Кувнытӧ ог кут.
Пӧчӧй вӧдитас жар пывсян,
Тӧда, оз ло дыш!
Пӧчлӧн корӧсь улӧ сывъяс
Сетла ассьым мыш.
Сэтчӧдз на ме овны кута
Пывсян бӧрад ён,
Кытчӧдз Ельциныд оз кондышт
Мортӧс дзебан дон!