КВАЙТ СУС ПУ
Йӧз костысь унаысь кывлам Та йылысь сёрнисӧ ми: мамъяслы мусаӧсь нывъяс, батьяслы донаджык пи. Челядьысь некод оз мездысь, насянь и керкалы дон. Ӧти важ вевт улын, грездын, быдмисны квайт мича зон. Бать, коді быдӧнысь шуда, радлунсӧ йӧзысь эз ну, — кодыр выль пи вӧлі чужас, садитас бара выль пу. Квайт сус пу ӧшинь ув йӧрас шонділань лэптісны юр. Таысь на гажаджык нӧрыс войвылысь эз эськӧ сюр. Ичӧтсянь босьтісны пиян парматі ветлысьлысь сям... Сӧмын войналӧн лёк биысь видзны эз кужны бать-мам. Этшаӧн кольлісны пайтӧг, суис кор ӧтувъя шог. Петісны гортсьыныс квайтӧн, некод тай бӧрсӧ эз лок… Арын кыдз гылӧдӧ коръяс тӧв паныд сулалысь пу, сывъяліс квайтнансӧ торйӧн бинас жӧ чишкассьӧм му. Киссис и керканыс важӧн, нӧрысас ыдждалӧ чӧв, коръяскӧ вӧвлӧм важ гажӧн котӧртлас вильшасьысь тӧв. Шувгӧны сус пуяс нора, кодлыкӧ мойдӧны пыр, важӧн кӧть эзысь Печора талунъя шыясӧн тыр. Пуяслӧн морӧссьыс сирыс Лэччӧ пыр войт бӧрся войт... Мый, век жӧ, унджыкыс мирас: шуд али морт сьӧлӧм дой?
Гижӧд
Квайт сус пу
Жанр: 

lkejrlkelkrgner klrjnelknfrkl ekjnrjkenfrej

1