ВОЙ ТӦВ НЭМЪЯС КУТАС СЬЫВНЫ71-ӧд мостоотрядса ёртъяслы-ударникъяслы,Усва вомӧн пос кыпӧдысьяслы, послысь коймӧдпыкӧд асьнысӧ жалиттӧг спаситысьяслы.Эг тӧд, лунын али войын вуджас Усва вомӧн поезд, кодӧс сывъяліс кузь пос — уна пыкӧд, уна кост. Тӧждлун менсьым сьӧлӧм йирис лоны первой пассажирӧн тайӧ поездас... Мед син аддзис дивӧ чужанін, кутшӧм вына мортлӧн киыс... Усва мездысис кор йиысь, сэк и тэчис ӧти зон коймӧд пыкӧдӧ бетон. Йӧймис скӧрлунысла юыс: коді лысьтіс сылӧн туйын сувтны паныд? Некор оз кыпты Усва вомӧн пос!.. Усва визув, Усва вына, кодыр кӧртвом помысь мынас, но код локтіс тэчны пос, оз жӧ бурӧн ӧні кос! Коймӧд пыкӧд... Ваыс содіс, но, а сійӧ зонмыс, коді тэчис пыкӧдас бетон, тӧдіс быд минутлысь дон. Ваыс ӧдйӧ содіс-кайис... — Унджык из да цемент вайӧй!.. — ещӧ ӧтчыд кыліс гор, Усва пленӧ босьтіс кор. Морӧснас бетонщик, аснас, пыкны сувтіс визув васӧ... Коркӧ амбразура тадз тупкис бойын сылӧн бать! Кын тундраса нюръяс шӧрын, кыті ветліс ӧтнас йӧра, кӧрт пос сывъяліс скӧр ю, Коми му да-й ненец му... Эг тӧд, лунын али войын вуджас Усва вомӧн поезд, кодӧс мичмӧдіс выль пос — уна пыкӧд, уна кост. Вой тӧв кутас нэмъяс сьывны, медым быдӧн тайӧс кывліс: багатыръясысь на ён роч му вылын чужӧм зон!
