МИЯН ЧУЖАН МУ — СССР

Кӧні чужан мулӧн пом,
кӧні сылӧн шӧрыс,
кымын юлӧн йыв да вом,
изъя кымын нӧрыс?

Бара киссьӧ шоныд зэр,
тулыс бара шонтӧ.
Миян мунымлысь веж эрд
дас час вуджӧ шонді.

Асыввылын сувтӧ лун,
рытыввылын кусӧ,
вот и видлы — кытшовт мун
ассьыд чужан мутӧ!

Восьтлы, сідзкӧ, карта лист,
пуксьыв вай сы дінӧ,
медым шензьӧдыштас висьт
Брестсянь Сахалинӧдз.

Озырлуныс сылӧн эм,
некор оз и бырлы,
тэчны мичаджык на нэм
пиянлы тшӧтш тырмас.

Медся бур да ыджыд шуд
видзам медся ёна,
сійӧс муртавны он куж
весиг деньга донӧн.

Бур семьяӧдз шог оз лок,
ёрта-ёртлы радӧсь,
уна кывъя чой да вок
олам мича ладӧн.

Ставсӧ шӧри юкам ми
ӧти пызан сайын,
весиг сьӧлӧмъясысь би
ӧтилаӧ ваям.

Медся ыджыд озырлун —
татшӧм оласногыс.
Сувтӧ Му шар весьтӧ лун,
югдӧ миян ногӧн.

Эм кӧ нянь-сов перъян ки, —
тырмас, майбыр, уджыд!..
Биысь-ваысь видзны ті
татшӧм мусӧ кужӧй!