В. И. ЛЕНИНЛЫ ПАМЯТНИК ИНТАЫНЕнэжті бара нин кӧдзалӧм кымӧръяс кывтӧны, сьӧлӧмнад кылан, мый войвылӧ матыстчӧ ар. Бронзаысь Ленин, кыдз ловъя, Инта шӧрӧ сувтӧма, сывъявны, быттьӧкӧ, кӧсйӧ шахтёръяслысь кар. Выль площадь мича, асфальтӧн зэв паськыда пуксьӧма, югыда ыпъялӧ сы весьтын пыдӧстӧм йир. Локтӧны татчӧ и пӧрысьяс мӧвпъяснас юксьыны, томъясӧс татчӧ, кыдз шуласны, чуксалӧ вир. Локтӧны, важӧн кыдз вичкоӧ волісны, висьтасьны, кыдз найӧ олӧмӧ пӧртӧны ассьыныс мог, мый найӧс мичмӧдӧ, мый эм на олӧмас мисьтӧмыс, быттьӧкӧ, Лениныс кылӧ и тӧждлун и шог. Свадьба кӧ карас, — дерт, локтасны жӧник невестакӧд, мед налысь шудлунсӧ нэм чӧжныс нинӧм оз вен: чужисны сёрӧн, а сійӧ, код сулалӧ на весьтын, пырис быд сьӧлӧмӧ сідз, кыдзи писькӧдчӧ ен. Татчӧ жӧ локтасны кузь туйӧ дыр кежлӧ мунысьяс, тыдалӧ, эновтны муса Интасӧ дзик быдӧнлы дыш. Тайӧ выль площадьсянь сӧмын нин, веськыда шуны кӧ, куйлӧ Полярнӧй дзик орччӧн, но тыдавтӧм кытш. Тулысын кыаяс енэжысь некор оз куслывны, тӧлын вой кыалӧн шензьӧдӧ сё рӧма мич. Татчӧ эз волы, но этша мӧй сьӧлӧмсьыс муслунсӧ юкис и войвывлы кувлытӧм миян Ильич? Тӧвзясны вояс, и атомнӧй нэм оз ло вынаджык бур войтыр паметьысь вуштыштны меддона ним... Видзӧй жӧ, видзӧй и мусӧ, и васӧ, и сынӧдсӧ, лысва мед усьӧ, а оз ставсӧ бырӧдысь сім!
