* * *

Арся вӧрлӧн рӧмъяслы пыр радла,
бокӧ некор ог кӧть вештыв син,
медым эськӧ татшӧм муса кадлӧн
дырджык сӧстӧм шудлуныс оз чин.

Мудзӧм морт моз ланьтӧдчӧма узьны
бадьяс костын эзысялысь ты.
Вермылӧ жӧ неуна да мудзны
тракторъяслӧн ыбъяс весьтын шы.

Аттьӧ тэныд, зарниасьӧм арӧй,
сыысь, мый тэ вӧлін татшӧм шань,
вайин миян сиктъяслы и карлы
пызан выв тыр вӧлӧга да нянь!

Озырлуныд быдӧнлы ӧд колӧ!
Сідзкӧ, содты, медым локтан лун
шогӧн ньӧтчыд эз дойд мортлысь олӧм,
челядьлысь эз повзьӧд кокни ун.