* * *

Му кӧ гӧрлін, — тӧдан сылысь дон,
амысь улад кыдзи сійӧ ловзьӧ.
Тӧда бура, тракторвывса зон,
мича уджыд асьтӧ оз ӧд повзьӧд.
Телезнаад кӧйдысыд оз чуж,
бӧрӧздалӧн туй джынйыс кӧ орӧ,
ёг турунлӧн чорыд да лёк вуж
ставсӧ венас аслас ыджыд горӧн.
Эн, тэ сійӧс му шӧрад эн лэдз,
вӧрӧгӧс моз голяӧдыс орлав,
сиктса мортлысь слава да бур честь
лёк вужйыскӧд ӧтлаӧ эн сорлав.
Шонді нюмъялӧ, и киссьӧ шоныд зэр,
тӧв ру косьтӧ гӧрӧм мулысь морӧс.
Синъяс водзад куйлӧ шуда эрд,
коді сиктса том войтырӧс корӧ
сетны сылы муслун да став сям,
сьӧлӧм пӧсьнад сы дінӧ и ойдны.
Муыд — сійӧ ставлӧн ыджыд мам,
мамтӧ жӧ оз кедзовтны, оз дойдны.