МУ ВӦДИТЫСЬ САДЬМӦ ВОДЗ

Му вӧдитысь садьмӧ водз,
шондіыскӧд вежмӧн,
идравтӧм кӧ турун лёдз,
ёгӧн кӧ му эжмӧ.
Сылӧн сьӧлӧмӧдзыс дой
оз весьшӧрӧ письтлы:
эз ӧд этша синва войт
пӧльыс муас кисьтлы...

Му вӧдитысь тӧдӧ дон
аслас крепыд кывлы:
батьыс кодь жӧ быдмӧ зон,
зільӧсь сылӧн нывъяс...
Но, а медся ыджыд честь
шуда мамлы усис,
зіль дояркаӧн оз весь
сиктын сійӧ шусьы.

Му вӧдитысь весиг шайт
весьшӧрӧ оз койышт,
юас, горш кӧ косьмас, чай,
ваяс чӧскыд сёян.
Вина лакысьяслы, дерт,
керка ӧдзӧс пӧдса,
некор некодлы десерт
зеллянад оз лӧдсав.

Му вӧдитысь — мича морт,
мичмӧдӧ и сиктсӧ,
том и пӧрысь сійӧс кор
медбур пыдди ликтӧ.
Уджысь сьӧлӧмыс оз пов,
киыс збыльысь зарни.
Дзоньвидзаӧн сё во ов,
талунъя ударник!