ВАНЧО ДА АВКО
Тундраын, море бердын, гызьӧ кӧн Кара вом, тӧвъясӧн пӧльтан эрдын сулалӧ ӧтка чом. Кӧр видзысь сэні олӧ, пӧрысь нин, важӧн дзор, сы дінӧ ӧтчыд волі, войвывті шӧйті кор. Пӧрысь морт сёян пуис, неылын куйліс пон, пӧрысьсӧ пӧльӧн шуысь котраліс — Ванчо зон. Колваса ненец рӧдысь шусисны пӧль да пи. Висьт серти ӧні тӧдӧй бурджыка найӧс ті. Ванчоыс чужліс туйын, гӧгӧр кор куйліс лым, кадыс кӧть ньӧжйӧ уйис, сьӧлӧмыс вӧлі пым. Лов шысӧ сетан здукыс бӧрынджык мед эз ям, лымйын эз этша купайт пиуксӧ аслас мам. Сы вӧсна шудыс сетіс тӧбека тэрыб кок. Котӧрӧн чумйысь петіс, чукӧстіс: «Во-ок!.. Вок!..» Ылынӧсь налӧн кӧръяс, сюръясныс — ловъя вӧр, корӧмнад он на пӧръяв косавны чомлань бӧр. Сэк, кодыр Ванчо чужис, кӧрпиӧс чужтіс кӧр, ю вомӧн сэсся вуджис, сывъяліс найӧс вӧр. Кӧинлӧн лэчыд синмыс вӧлӧма пуртысь ёсь: позьӧ мӧй шуны нимнас кӧрыдкӧд сылысь кось? Кӧрпилӧн аслас енмыс видзӧма сылысь юр, Ванчо да сылӧн нэмыс лоӧма ӧткодь бур. Чом дорын быдмис Авко, ки помысь сёйис нянь, мыш вывсӧ вевттян шальыс небыд да мича, шань. Понъяскӧд кужліс дурны, ичӧтджык вӧлі кор, сылӧн зэв лэчыд сюрыс кыпӧдліс лявзан гор. Сӧвмис да регыд воис уджйӧзсӧ мынтан дор: збой менурейӧн ^кӧр стадаса вожак/^ лоис Ванчолӧн быдтантор. Тӧвзьӧ вӧй кӧръяс водзын вужйысь моз лэдзӧм ньӧв, сюръяснас вундӧм розьын шутьлялӧ дурмӧм тӧв. Медпаськыд юсӧ вуджас, сы бӧрся — медляб кӧр, кыалӧн садьмӧм вуджӧр сюръясас ӧзъяс гӧрд. Ванчолӧн батьыс первой стадаса бригадир, повзьӧдны ӧмӧй вермас Каралӧн кӧдзыд йир? Кӧръяслы мунны ылӧдз, туйлӧн оз тыдав пом. Тыбердса нӧрыс йылӧ ёсь йыла сувтас чом. Вылас малича чӧвтас, тӧбекӧ сюяс кок, чукӧстас куим пӧвстӧн Ванчоным: «Вок!.. Вок!.. Вок!..» Мудз кӧть да чомсянь ылын, кыпӧдас Авко юр: ичӧт кӧзяин сылӧн быдӧнысь медся бур... Тӧв помад йиа чарӧм пуксьывлӧ ёна кыз, кӧръяслӧн вошӧ ярлун, дойясӧн висьмӧ гыж. Туйын и Авко водіс, тшыгысла воштіс вын, мынны эз вермы кодысь кӧръяслӧн стада джын. Мунісны водзӧ ёнъяс, корсисны сёйны рой. Кӧдзыда енэж вонсянь дзирдаліс Тӧлысь войт. Сувтлас тшыг кӧр да водзӧ вӧчлас жӧ воськов-мӧд... Куйлыштны бара позьӧ... Мый дыра? Дерт, оз тӧд... Кызьысь, а, гашкӧ, сёысь сувтлас да водлас кӧр, сьӧкыд кӧть гыжъяс дойыс, пӧрлас нин, но оз пӧр... Тадзи и Авко вуджис чарӧма-йиа эрд. Синъясас сэсся чужис морелӧн гыа сер. Кӧр рӧдлысь вына гӧлӧс эз ӧмӧй сійӧ кыв? Пӧсьджыкӧн, гашкӧ, вӧлі Ванчолӧн мелі сыв. Кадыд кӧ абу тувсов, дзоридзӧн тундра гӧль. Виччысьтӧг сэк и кувсис Ванчолӧн пӧрысь пӧль. Чомйын эз этша ов нин Кӧрдорса удал морт, Му вылысь эз и помнит мӧд нога ассьыс горт. Петкӧдны чомсьыс корис сэк, кор на вӧлі садь, мед сылӧн сьӧлӧм дорас топӧдчис аслас дадь... Ванчо да Авко шӧри юкисны курыд шог... Шонділӧн югӧр гӧрис му эжсӧ уна ног. Виччысьлӧй, Ванчо лоас пӧльсьыс да батьсьыс сюсь. Бипурыс сылӧн чомъяс ӧткӧн оз коль да кус. Войвывлӧн медбур мичлун вӧвлі да лоас кӧр. Видз жӧ тэ, найӧс, видз тэ, тундралӧн сьӧлӧмшӧр!
Гижӧд
Ванчо да Авко
Жанр: 

lkejrlkelkrgner klrjnelknfrkl ekjnrjkenfrej

1