СИБИРЬ ПӦКӦРИТЫСЬЯС ЙЫЛЫСЬ СКАЗАНИЕ
Дежнев Семён мунӧ царлы Сибирь пӧкӧритны сійӧ жӧ туйӧд, кыт ветлывліс коркӧ Ермак, роч йӧзлӧн му дінӧ выль муяс лӧсьӧдчӧ йитны, чукӧртны царскӧй казнаӧ тшӧтш унджык ясак. Устюгса вичколӧн жыннянъяс бовгӧны гора, медасьны кузь туйӧ быдласянь локтӧны йӧз. Казьтылӧ кодкӧ Мезень, мӧд морт ошкӧ Печора, морӧсыс кодлӧн вой море кодь паськыд да лӧз. Устюгӧдз комияс кыссьӧны пармасянь подӧн, кывлісны тшӧтш, мыйла бовгӧны жыннянъяс тан. Юасьӧ Дежнев Семён, царлӧн сюсь воевода: — Мый кужан вӧчны тэ, висьтав вай, Дмитрий Зырян?.. Пармаса морт воча кывйысла зептас эз пырав: — Гӧрны да вӧравны... Зумыштчис Дежнев Семён: — Гӧрысьыд, аддзан тай, быдлаын шӧйтӧ со, тыр эм, вӧравны велалас, ме думысь, медся рам морт!.. Мый ещӧ кужан тэ?.. — Тшупа да кыпӧда керка, ас вылын, ковмас кӧ, пармаысь кыскала кер... — Тшупсьыны, тӧда, быд нывбаба войвылад вермас, лэчыда тӧчит да сет сӧмын киясас чер!.. — Бипуртӧг, тшӧктан кӧ, талун кӧть лым вылын узя!.. — Тшӧкта кӧ... — виччысьтӧг меліа югнитліс Дежневлӧн син. Пармаса мортлӧн тшӧтш скӧрлуныс сьӧлӧмас пузис, морӧссьыс воштыны кутіс нин тіпиктанін. Дмитрий Зырян дӧрӧм сосъяссӧ гырддзаӧдз пуджис, сьӧлыштіс киас да кабырсӧ мыччис, кыдз сюр: — Медбӧрын, быдӧнысь ярджыка тышкасьны кужа... Ог повзьы, Дежнев, роч войтыркӧд пуктыны юр!.. Сывъяліс пармаса мортӧс сэк смел воевода, мыш саяс ӧшӧдіс ассьыс кремнёвка да шы. Колльӧдіс найӧс ен вӧляӧн ылыс походӧ вичкояс жыннянлӧн дыр ещӧ лӧнявтӧм шы. Моресянь мореӧдз паськӧдчис миян Россия! Асылын шондіыс мыччысьӧ-петкӧдчӧ кысь, — сэні и узьӧны, ыджыд Сибирь помын, пиян, кодъяслысь подвигсӧ мырддьыны некод оз лысьт.
Гижӧд
Сибирь пӧкӧритысьяс йылысь сказание
Жанр: 

lkejrlkelkrgner klrjnelknfrkl ekjnrjkenfrej

1