ПОМНИТА ДЗОРИДЗ КОДЬ НЫЛӦС
Шуласны тай, — нывъясыд пӧ нэрӧсь, налы колӧ мелі нюм да сыв... Миян батальонын вӧлі Вера — санинструктор, сӧмын ӧти ныв. Дзоридзӧн и вӧлі сійӧ налы, кодъясӧс эз ӧтчыд сотлы би, ранаяссӧ эталысь и талысь эз ӧд ӧтчыд кӧртав сылӧн ки. Витсё зонлы Вера вӧлі чойӧн, но кор шогсьӧ сьӧлӧм, ноксьӧ сям, ловзьылӧны вӧтын моз сьӧд войын гӧтыр и невеста, и бур мам.. Дерт жӧ, налысь мелілунсӧ юкліс руд шынеля ёртъясыслы ныв, морӧс бердас сӧмын кӧть и кутліс, кодлӧн сьӧлӧм тіпкӧмыс эз кыв. Татшӧмӧн и сійӧ эськӧ колис нэриник, но сӧстӧмлуннас ён. ...Мездыны Чугуев врагысь нёльысь кыпӧдчыліс миян батальон, но ӧд овлӧ, — битӧ би оз керав, — ӧти воськов водзланьӧ он письт. Киссьӧм вичко вывсянь свинеч шерӧн ытшкис автоматъясысь фашист. Шӧйӧвошны позьӧ сэтшӧм кадӧ, кор комбатлӧн гӧлӧсыс оз кыв... Сувтіс сэк да уськӧдчис гӧрд флагӧн враглы воча миян муса ныв. Сы бӧрся став ярлуннас тыр гыӧн косьӧ пырис взвод бӧрся выль взвод, Севернӧй Донецлӧн кӧдзыд рыӧ медбӧръя фашист кытчӧдз эз вод. Вера куйліс ичӧтик куш эрдын, чегӧм дзоридз эз нин восьтлы син, но пыр кутіс аслас морӧс бердас йиджтысьӧм пӧсь вирӧн паськыд бинт.
Гижӧд
Помнита дзоридз кодь нылӧс
Жанр: 

lkejrlkelkrgner klrjnelknfrkl ekjnrjkenfrej

1