КЫВТАСНЫ ВОЯС

Кывтасны вояс,
	но сьӧлӧмад дойыд
некор, ме тӧда,
	оз бурд
на кузя, кодъяс
	фашистъяскӧд бойын
пуктісны
	ассьыныс юр.
Пыр кутас казьтывны
	вежӧдысь пуыс
бать-мамлысь
	вунлытӧм шог:
куйлӧны ӧтувъя
	зэв ыджыд гуын
кодлӧнкӧ верӧс да вок.
Помнитӧй, ловъяяс,
	налысь быд вуджӧр,
киподтуй,
	синъяслысь сер.
Помнитас мед,
	коді сёрӧнджык чужас,
нӧйтліс кыдз
	миянӧс шер.
Крепыда кутӧ
	гвардейскӧй застава
мирнӧй границалысь визь.
Усьӧмлысь кувлытӧм
	подвиг да слава
видзӧ быд сьӧлӧм да из.