ВОЙНАЛӦН ЙӦЛӦГА

Алексей Лютоевлы, войнаса инвалидлы
Палатаын сӧмын и эмыс кык койка да нёль еджыд стен. Эн куйлывлы некор на нэмад тэ, шуда морт, тыдалӧ, сэн! — мед ен видзас, шуласны, водзӧ пыр тыр-бурӧн колльӧдны нэм. Ӧд быдӧнлӧн туй индысь кодзув и бурджык, и омӧльджык эм. А тэнӧсӧ мыйла нӧ бара палатаӧ вайисны, друг? И тыртансӧ кымынӧд арӧс — тшӧтш кӧсйысьӧ тӧдны хирург. Ёсь скальпельяс куйлӧны орччӧн, сестра вайӧ шприцъяс да спирт. Тэ кевмысян, норасян, ёрччан, мед пидзӧстӧ протез оз нирт... Но кокниа вӧчӧны ӧні, он вермӧдчы восьлавны кор: дзик сы бердті, кок лыыд кӧні, пыр вундасны неыджыд тор. А тэныдсӧ терпитны кыдзи, кор ыдждалӧ лы пытшкад пурт? Кӧть му шарсӧ гугӧд да пыдзырт, но кок пӧлыд оз жӧ нин сюр. Ме кевмыся тӧдса хирурглы, ог дзеб ассьым тӧждлунӧс войт, мед фронтвывса вӧвлӧм бур друглы эз вӧч сійӧ видзчысьтӧм дой. Наркозлӧн пӧ выныс на ыджыд, оз ор менам другӧйлӧн ун, а сійӧ, хирург, абу мыжа, мый шоглуныд йирӧ оз сун. Кӧть комын во коли нин бӧрӧ, кор шонділӧн ясыдмис кытш, но, кажитчӧ, ловъя на вӧрӧг, а коктӧм пыр нуӧдӧ тыш.
Гижӧд
Войналӧн йӧлӧга
Жанр: 

lkejrlkelkrgner klrjnelknfrkl ekjnrjkenfrej

1