ДЕДӦЛӦН МЕДАЛЬЯС
Арся войыд вывті кузь, унмыд пӧттӧдз шедӧ, сы вӧсна и оз на узь челядькӧд тшӧтш дедӧ. Сійӧ пыр на зіль да збой, кӧть и дзор нин важӧн, ассьыс колльӧдӧ лун-вой внук да внучка гажӧн. Дедӧ кыпыд нюмӧн тыр, кылӧ ӧд, кыдз найӧ сійӧс ыдждӧдлӧны пыр пӧльӧн, ыджыд айӧн. — Пӧль кӧ, — шуас, — медым пӧль, том кадӧс ог жалит. Абу некодысь тай гӧль, — морӧс тыр медальӧй!.. Тасма зэвтас, видлас тош, — гӧгӧр медым лада, — майбыр, сійӧ оз на вош весиг томъяс радын. Збыльысь, дедӧ мунӧ кор матӧ либӧ ылӧ, дас медальлӧн мича гор сьыланкыв моз кылӧ. Вӧчас воськов — дінь да дінь, вӧчас мӧдысь — бара... Генераллысь, чайтан, чин босьтӧм кольӧм арын. Челядь кытшысь дыр оз мын, оз и тэрмась мунны: кыдзи колис олӧм джын, вермас ӧмӧй вунны? Грездас котыртіс колхоз, ачыс медводз пырис. Тайӧ сылӧн гӧрд обоз ыбъяс вывті мунігмоз вӧвлӧм боръяс кырис. Воис тшыгъялӧмлы пом гӧля овлӧм грездын, дзикӧдз мыніс Катыдпом сылӧн шуштӧм везйысь. Ӧтув гӧрны-кӧдзны му кутісны зіль войтыр, быттьӧ гора бузгысь ю чужис уна войтысь. Дедӧ нэмыс вӧлі дась медся водзӧ петны да сӧветскӧй шуда власть аслас киӧн тэчны. Эз жӧ ёна нюжмась-дзӧр сэк, кор вына горӧн Коми мулысь уна вӧр пятилетка корис. Босьтіс киас пила-чер содтыны веж зарни. Муса дедныс вӧлі, дерт, медводдза ударник. А кор уськӧдчис пеж враг миян шудлун вылӧ, пӧся сывъялыштны кад вичмис пиӧс-нылӧс... Уна лун да уна вой чорыд тышын-биын нуис сьӧлӧм пытшкас дой челядьлысь тшӧтш сійӧ. — Вывлысь висьтав, ыджыд ай, — ичӧт внучка корӧ, — кыдзи воис югыд Май бара миян дорӧ?.. — Энлы тэрмась, — вундас дед, — коклябӧр эн таляв: эз зэв кокниа ӧд шед меным дас медальыд! Врагысь дорйи Ленинград, дорйи тшӧтш и Волга... Сэтысь эз уна лёк гад гортланьыс бӧр довгы. Зумыш лолас, ӧзъяс бор, гусьӧн чышкас синва, быттьӧ пӧсь войтыс оз тӧр дедлӧн мелі синмас. — Сійӧс, дерт, ог вунӧд нэм, Днепр кыдз вуджны кутім... Выль медаль сэк сетіс мем генерал Ватутин. Ылӧдз нуим, дона пи, ассьыным бур слава, лёк фашистысь мездім ми Прага да Варшава... Сэк выль орден да медаль содіс морӧс вылын. Жаль, ой, кутшӧм меным жаль сійӧ, дона нылӧй, коді пуктіс ассьыс юр, тышысь эз пет ловйӧн... Миян дойным дыр оз бурд, славалы — нэм овны. Воис Гитлерлы сьӧд пом аслас зывӧк гуын: пӧтіс жер паськӧдӧм вом свинечӧн да муӧн. Челядь кывзӧны кузь висьт... Дедлӧн олӧм-вылӧм оз мӧй сьӧлӧмӧдзныс письт, кыдзи медбур сьылӧм! Война бӧрын ковмис дыр дзоньтавны быд овмӧс, дерт, и налӧн дедлы пыр сосъяс пуджны ковмис. Мир да шудлун доран удж виччысисны кияс. Нинӧм му вылад оз чуж мырсьытӧгыд, пиян! Уджын-тышын коли нэм. Челядьлӧн тыр керка! И медальыд дедлӧн эм, Ленинлӧн кӧн серпас. — Кужӧй, — шуас, — челядь, ті видзны тайӧ мусӧ. Медым некод зарни би миянлысь оз кусӧд. Шуда ныв да удал зон вынсӧ оз кӧ жалит, сылы медся ыджыд дон, тырмас и медальыд!
Гижӧд
Дедӧлӧн медальяс
Жанр: 

lkejrlkelkrgner klrjnelknfrkl ekjnrjkenfrej

1