СӦВЕТСКӦЙ ПАСПОРТ ЙЫЛЫСЬ СТИХЪЯСМе кӧин моз эськӧ йири бюрократизм. Мандатъяскӧд ӧти сайын ме матере ыста быд бумага лист, быд гижӧдтор — чӧрту! Но тайӧс... Купе да каютаяс фронт кузя тшӧг чиновник ветлӧдлӧ, вишкӧ. Сдайтӧны паспортъяс. Ме сдайта тшӧтш ассьым пурпурнӧй книжкаӧс. Ӧтияс дінӧ — пельӧдз нюм сер. Мукӧдъяс дінӧ — сувтӧны бӧрӧн. Почётӧн босьтӧны, например, паспорт английскӧй лев звераӧс. Бур дядяысь здук кежлӧ вештывтӧг син да кос выйӧдз дугдывтӧг кланяйтчиг босьтӧ «чай вылӧ» моз господин паспорт американецлысь. Польскӧй вылӧ — шемӧс жандарм. Польскӧй вылӧ — чуймӧма бан, слӧнлӧн моз бугыльыс лапъялӧ — кысь пӧ да кутшӧм лоӧма тан выльторъяс географияын? Оз вӧрзьӧдны ньӧти весиг син лыс, и некутшӧм чувство оз тӧдлыны, кор босьтӧны паспорт датчанинлысь да быдсяма сикас шведлысь. И друг сэні тӧдны позьтӧмӧдз чукыртіс господинӧс. Тайӧ господин чиновник босьтӧ менсьым гӧрд кышӧда паспортинаӧс. Босьтӧ — кыдз бомба, босьтӧ — кыдз бритва, лэчыдӧс, кык дорӧн вундысьӧс, босьтӧ, кыдз 20 юра гидраӧс, сывйӧн да джынйӧна гундырӧс, Носильщиклы, буракӧ, сьӧлӧмӧдз инмис, кӧть кӧлуйтӧ пыртас дарӧм. Жандарм дзоргӧ сыщиклы синмас, Сыщик — жандармлы. Кутшӧм горша эськӧ жандармскӧй ярлунӧн ме вӧлі казнитӧм, гашкӧ, сійӧн, мый ме киын — чарлаа мӧлӧта сӧветскӧй паспорт. Ме кӧин моз эськӧ йири бюрократизм. Мандатъяскӧд ӧти сайын ме матере ыста быд бумага лист, быд гижӧдтор — чӧрту! Но тайӧс... Ме кыска сьӧлӧмӧй дінысь, кыдз дубликат бесценнӧй грузысь. Лыддьӧй и вежалӧй: ме — гражданин Сӧветскӧй Союзысь.
