МЕ ВӦЛІ РАКЕТЧИКӦН, МАМӦ

1
Ме вӧлі ракетчикӧн, мамӧ, И гортад эг веськав кӧ бӧр, Тэ ланьтӧдны сьӧлӧмтӧ сяммы, Пӧсь синванад, дона, эн бӧрд... Салдатыдлӧн службаыд сэтшӧм: Кӧть пуксьывлӧ му вылӧ мир, Границаяс видзиг оз этша Пыр киссьывлӧ кодлӧнкӧ вир. И колӧ жӧ сідз вӧлі лоны... Ме ставсӧ тэд висьтала, мам, Мед ме вӧсна яндысьтӧг олін, И шудлуныд некор эз ям. Вай синватӧ чышкав... Ме тӧда, Кыдз пыдзыртӧ сьӧлӧмтӧ шог, Но ёнджыка радейтны мӧдам Ми ассьыным Дальньӧй Восток, Кӧн шондіыс медся водз петӧ, Но медся водз локтӧ и вой. Сэн сулалӧ менам ракета, Но биа шер сійӧ оз кой: Лӧз енэжлань вӧр пӧвстсянь дзоргӧ. Мед выль Чингисханыд оз дур; Пыр вевттьыны дась аслас бордйӧн. Кӧть ылыс, но дона Амур. Ог пет нин ме выль караулӧ, Збой ёртъяскӧд орччӧн ог мун. Тан, неыджыд памятник улын, Ме аддзи нин палявтӧм ун. Ёсь дойыс и ёртъясӧс личкӧ, Оз быр налӧн сьӧлӧмысь шог, Но казьтыштас быд перекличка, Мый тшӧтш пӧрта олӧмӧ мог. Комбат петас водзӧ: — Бушуев?.. Чӧв ланьтлас салдатъяслӧн строй, Но медводзын сулалысь шуас: «Пыр миянкӧд орччӧн Герой!..»
2
Ой, мыйта тэд висьтавны колӧ, Бур сьӧлӧма, меддона мам!.. Быд мам сетӧ челядьлы олӧм, И вежӧр, и морттуй, и сям. А тэ вӧлін мам дорысь унджык — Учитель и медматыс морт. Збой олӧмӧ пиыдлы вуджны Тэ козьналін зэв унатор. Пыр помнита, некор ог вунӧд, Мый вунӧдны некыдз оз позь: Выль школаӧ кыкӧн ми мунам, А асылыс вывті на водз. Виж коръясӧн коясьӧ арыс, Со пӧрччӧдӧ паркысь быд пу. Ме шуда... Мем стӧч сизим арӧс, А челядь дыр — дерт жӧ нин шуд. Тэ шыльӧдан юрсиӧс кинад И радлунтӧ ассьыд он дзеб, Кор велӧдан: — Книгатӧг, Дима, Бур мывкыдыд мортлы оз шед... Ме кута букварь, а тэ — дзоридз, Он ӧтиӧс — быдса букет. Тадз сулалам выль школа дорын, Учительным кытчӧдз оз пет. А сійӧ дзик тэ кодь жӧ мелі, Пыр помнита сылысь пӧсь сыв. Со гижны нин велӧдӧ мелӧн Быд сьӧлӧмлы медматыс кыв. Дерт, сьӧкыдкодь медводдза воськов, Но дзик некор сійӧ оз вун: Тадз пиыдлы олӧмыд воссис, И медводдза велӧдчан лун.
3
Ме чужи, кор му пытшкӧ йиджис Став вӧвлӧм войнаяслӧн вир, И медводдза кыв, кодӧс гижи, Ме гижи тетрадь мышкӧ — «МИР». Мед сэк эз на судзсьывлы вежӧр, Кыдз донъявны дженьыдик кыв, Но «Мед олас шонді да енэж» Ми радейтлім сьыланкыв. Ӧд садикын сійӧс на сьывлім, Тшӧтш сэтчӧ ме котралі кор. Быд мам, чайта, унаысь кывліс Пӧсь сьӧлӧмсӧ вӧрзьӧдантор. А воясыд кывтісны бӧрӧ, Выль тулыстӧ вежліс выль ар. Мем кажитчӧ, быттьӧ на тӧрыт Ухта шӧрад лӧсьӧдім парк. Быд пу сэні вежӧдӧ бара, Выль керкаяс лэптӧ бетон, И котӧртӧ шондіа карӧд Дзик ме кодь, но мӧд мамлӧн зон. Мед быдмӧны зонъяс да нывъяс, И быдӧнкӧд восьлалӧ шуд! А бурджык да мичаджык кывъяс Ме бурсины налы ог куж.
4
Ухта... Синмӧс куня, но аддза Том карлысь быд паськыд проспект. Водз асывсянь зарниа раддзӧн Пӧсь шондіыс восьлалӧ сэт. Эм му вылад каръясыд уна, Но ас карысь бурджык оз ков. И та йылысь гораа шуны Ме ичӧтсянь, мамӧ, эг пов. Став кодзувъяс чукӧртіс сійӧ Да ас весьтас ӧшӧдліс тыр. Со паркным... Со школаным миян, Кӧн прӧйдитіс став челядь дыр. Ме велӧдча медбӧръя классын Да бӧръя нин олӧмӧ туй. Лӧз енэжыс ми весьтын ясыд, Оз сьӧд кымӧр миланьӧ уй. И прӧст кад кӧ веськавлас коркӧ, Эг воштылӧй ни ӧти здук. А коді нӧ збой комсомолкӧд Пӧсь сьӧлӧмсӧ шӧри оз юк! Кор радейтан сынӧд и шонді, Сэк муртасьны вынӧн он пов. Ме тан, аслам школаын понді Пыр чорзьӧдны лы-яй да лов. Кӧть чужим ми зэв кыпыд кадӧ, Кор пуксьыліс му вылӧ мир, Но пӧльтчисны складъяс снарядӧн, Мед бара нин кисьтыны вир. Да, пасъясны мукӧдъяс коркӧ И кыпыд, и медсьӧкыд нэм... Ӧд му шарлысь шудлунсӧ торкны Эз ковмывлы вежӧра вем. И та вӧсна корӧ быд пиӧс Военнӧй комиссариат... Со тадзи и ме босьті киӧ, Мед дорйыны мир, автомат...
5
Ми сывъясим, мамӧ, зэв пӧся, Да, медбӧрын, орӧдім ки... Сэк, йӧз пӧвстын, некыдз оз лӧсяв, Мед синвасӧ петкӧдліс пи. А мыйла, збыль, яндысьны сыысь, Мый сулывлӧ торйӧдчан шог? Скӧр морелӧн гымалӧм шыӧн Со матыстчӧ Дальньӧй Восток. Ой, кутшӧм тэ паськыд, Россия, Став муясысь меддона му! Пыр чуймӧдӧ тэнсьыд быд пиӧс Быд кар, ыджыд стройка да ю. Мед сувтлытӧг поездным тӧвзьӧ, — Оз сибавлы син бердӧ ун, Кузь войясӧ сӧмын нин ловзьӧ Ухта шӧрад колльӧдчан лун. Мый мӧвпалі зэв ыджыд туйын, Кор аддзи Россиялысь вын? Сибирса лӧз енэжӧд уйис Заводъяслӧн помасьтӧм тшын. Ме висьтала ӧтнадлы, мамӧ, Мый думайті туй вуджиг чӧж: И менам эм, кажитчӧ, сямӧй, Но нинӧм на бурсӧ эг вӧч. Да-й верми-ӧ ме мыйкӧ вӧчны, Мед шуисны ошкана кыв! Выль каръясӧн му эг на вӧччӧд, Эг гӧр, эг на кыскывлы тыв, — Ме сӧмын на лӧсьӧдчи овны Да тэныд тшӧтш содтыны шуд… Эн бӧрд, ме кӧ абу нин ловъя, А выль олӧм овны ог чуж...
6
И колӧ жӧ тадз вӧлі лоны... Дерт, тэнад, мам, шогыд эз быр, Кор пиыд оз тӧлысь, а во нин Оз гиж нинӧм, чӧв олӧ пыр. Но ме пыдди гижасны мукӧд, Кыдз кужасны, гижасны сідз. Тэ налысь став письмӧяс чукӧрт Да менӧ моз нэм чӧжыд видз. Эг врагъяскӧд паныдась тышын Да виччысьтӧм пуляысь усь. Тан, зэв джуджыд сопкаяс кытшын, Ракетчикыд, мамӧ, оз узь! Границатӧ потшӧма бура, Оз вудж сійӧс ни ӧти чӧрт... Веж гыясӧн миян Амурыд, Кыдз овлӧ, эз омляв да вӧр. Мӧд гожӧм нин служба ме нуи, И тӧдан-ӧ, кыдз лои рад, Комбат кодыр строй водзын шуис: «Бушуевлы отпускӧ кад!» Ракетчиклы отпускыд — праздник, Бур службаысь сетӧны кор, И тэ менӧ ас дінсьыд аддзин, Дзик нинӧм кӧ туйӧс эз торк. Билет куті киын... А луныс Водз асывсянь лои зэв жар. И, ме чайта, некод оз вунӧд Тревогалысь шысӧ: — Пӧжар!.. Морт повзьывлӧ виччысьтӧм горысь, — Ракетчиклы повны оз позь... Ме аддзи ракетаяс дорысь Гӧрд биыскӧд сывъясьӧм коз. Веж пармаыс лолаліс тшынӧн, Би тэрыба паськаліс пыр, И, кажитчис, юр весьтын сынӧд Дон биыскӧд лои нин гырд.
7
— Тревога!.. Тревога!.. — Тревога!.. Казармаысь ӧдйӧджык пет! Ме сулала... Видзӧда гӧгӧр Да кута транзитнӧй билет. Збой ёртъясӧй черӧн да зырйӧн Лёк биыскӧд панӧны вен. А меным тшӧтш оз ӧмӧй тырмы, Друг думышті, местаыс сэн? Эг зыр помӧ кутчысь... Гаражын, — Ме мӧвпыштны водзджык эг куж! — Бульдозерным сулаліс важӧн Да виччысис аслыс тшӧтш удж. Приказ сійӧс петкӧдны колӧ... Но виччысьны тшӧктӧмсӧ кор? Атакаӧ уськӧдчан горӧн Машиналӧн ловзис мотор. Ме петкӧді вӧр дорӧ сійӧс Ён амысьнас вундыны туй, Мед адын моз ыпъялысь биыс Ракеталань, водзӧ, эз уй. А письтіс кӧ сы дінӧ биыс? Мед некод, мый лои, оз тӧд... Ме босьті рычагъяссӧ киӧ Да содті бульдозерлы ӧд. Эз сисьяс моз гылавны пуяс, Кӧть ыпъяліс налӧн быд рос. Друг кылі: — Бушуев!.. Бушуев!.. Вай ӧдйӧджык би пытшкысь кос!.. Эг подвигӧн чуймӧдны кӧсйы Ме ассьым смел ёртъясӧс, мам. Кор сьӧлӧмыд тыш вылӧ ӧзъяс, Сэк некод оз овлывлы рам. А збыльысь кӧ веськыда шуны, — Дзик нинӧмтор тэысь ог дзеб, — Пыр кокниджык ӧтилы кувны, Но мукӧдъяс олӧны мед! Но та йылысь мӧвпалан кадыс Сэк, дерт, менам ньӧти эз вӧв... Эз му вывті — збыль биа адӧд Крут сопкаяс вуджис кӧрт вӧв. И сэк, тайӧ медсьӧкыд здукӧ, Друг чӧв ланьтіс сылӧн мотор... Машиналӧн сьӧлӧмас тшуки Нем жалиттӧм биыслӧн борд… Ме уськӧдчи ловзьӧдны сійӧс, А доналӧм ключ сотіс киӧс... Но сійӧс ме эг ӧд нин кыв, Кыдз ыпъялысь дявӧлӧс виис Кык сьӧлӧмлӧн ӧтувъя взрыв...
8
Ракетчикъяс лэптісны менӧ, Но вом дорӧй вӧлі нин кын, А усьӧмӧс ловзьӧдны эм-ӧ Став мувывса врачьяслӧн вын? Ме сы вӧсна пыр шогси сӧмын, Мый нэм чӧжӧн нинӧм эг вӧч... Амур весьтын кыалӧн рӧмыс Мед пыр лоас югыд да сӧдз! Тан медся водз кыпӧдчӧ шонді Да сывъялӧ пӧся быд пу. Печораса сиктъясысь зонъяс Тан видзӧны миянлысь му. Тэ некор эн эскы, бур мамӧй, Кор лэптасны лёк нога вен, Мый ӧнія том йӧзлӧн сямыс Да смеллуныс этшаджык эм. Ме, ковмас кӧ, кыпӧдча гуысь Да морӧсӧн пыка выль би. И тадзи жӧ вӧчас, ме тӧда, Быд бать-мамлӧн ме кодь жӧ пи… А татшӧм веж петасыд эм кӧ, Оз косьмы и пуыдлӧн вуж. Россияӧс жугӧдны менсьым И выль Чингисханыд оз куж!
Гижӧд
Ме вӧлі ракетчикӧн, мамӧ
Жанр: 

lkejrlkelkrgner klrjnelknfrkl ekjnrjkenfrej

1