НЯНЬЗина ветліс магазинӧ, Сэтысь вайис небыд нянь, Сэсся вештіс кӧрыш дінас Кык тарелка да кык пань. Мамыс кодыр абу гортас, Сэк кӧзяйкаалӧ ныв. Кӧні сылӧн вокыс ворсӧ, Мыйла гӧлӧссӧ оз кыв? Зина чуксасьӧ нин: — Вася! Ӧбед лӧсьӧді ме. Лок! Ыджыд валегиа, пася Пырӧ гортас томджык вок; Пырӧ, пӧрччысьӧ да мыссьӧ, Ворсӧмысла пӧт и мудз... — Мыйла Татшӧм дыша кыссян?— Чойыс шуӧ: — Сёй да узь! Вася дузъялӧ... Ой, кутшӧм Сійӧ талун абу шань! — Рудзӧг няньтӧ ачыд кушайт... Меным колӧ еджыд нянь!.. Мамыс ыбын, батьыс вӧрын, — Некод ӧлӧдны оз лок. Куйлӧ пызан вылын кӧрыш, Небыд няньсӧ оз и шӧрышт Том кӧзяйканымлӧн вок. Вася вежӧртӧм на зон: Няньлысь эз на тӧдмав дон! Панім нянь йылысь кӧ сёрни, Орччӧн, зонмӧ, пуксьыв вай. Чужнытӧ ӧд эн на сёрмы, Ми эг мырддьӧй тэнсьыд пай. Тырмас тэныд шуд и сынӧд, Вичмас еджыд нянь и удж, Сӧмын быдмы зіль да вына, Тшӧтш и пиньтӧ видзны куж! Мыйла, Вася, дзикӧдз ланьтін: Коді быдтӧ-вӧчӧ няньтӧ, Коді кӧдзӧ, коді вундӧ, Медым няньыс лои унджык, Еджыд, Сьӧд И сдобнӧй кӧвдум Куйліс пызан вылад тыр? А ми, Вася, водзті тӧв джын Сёйтӧг узьны водлім пыр... Миян Коми муным паськыд, Уна сӧстӧм ю да шор, Но — тэ тӧд! — сӧветскӧй властьӧдз Тшыг пыр вӧлі коньӧр-морт. Сійӧ сёйис жуг да идзас, Эз вӧв идзас — кулис кач. Челядь синъяс улысь видзис — Татшӧм пӧжасторсӧ пач. Сэсся кынӧмъяссӧ йирис Чорыд жугйыс лун и вой, Корсьны кынӧмпӧт Сибирӧ, — Да кӧть медся джуджыд йирӧ! — Вӧтліс тшыглун, Синва, Дой. Татшӧм, Вася, вӧлі олӧм... Тадзи-й эськӧ олім ми, Эз кӧ сійӧс сот да орӧд Революциялӧн би. Тайӧ лои кӧдзыд арын, Кор нин уси слӧт да лым: Выль нэм индіс дзонь му шарлы Гӧрд «Авроралӧн» ён гым. Ленин... Сійӧ, Вася, кодлӧн Пуис гӧль йӧз вӧсна вир, Шуис: — Му — народлы! Нянь — народлы! Шуд да Мир! Ставсӧ босьтны ковмис тышӧн, Нуны озыръяскӧд кось. Враглысь пасьвартісны кытшсӧ Гӧрд салдат да гӧрд матрос. Кын окопын да блиндажын, — Пыр поход, атака, тшын! — Эз, боецъясӧс эз гажӧд Куим пельӧ юкӧм пажын, — Куим мортлы шӧрӧм джын. Накӧд ӧтвыв Ленин пыкис Сьӧкыд лун и сьӧкыд вой. Кодкӧ сёйліс кӧ сэк кыкысь, — Сійӧ унджыкысь эз сёй. Со ӧд кутшӧм, ичӧт пиян, Вӧлі муса Ленин миян! Ӧтчыд, дум вылас кор уси Вождьлы юны юмов чай, Кодкӧ, висьталӧны, гусьӧн Сылы вайис лишнӧй пай. Ленин лои стрӧг да зумыш, Бокӧ вештіс чайнӧй пань... ...Сэсся некод нин эз думышт Сылы гусьӧн вайны нянь! Ставсӧ водзвыв сійӧ тӧдіс, Кыдзи ловзяс миян му, Паськыд ыбъясын кор мӧдас Кышакывны воӧм сю; Трактор шыысь садьмас асыв, Петас ыбӧ Гӧрд обоз... Сійӧ аддзас шуда чассӧ, Кодыр медводдза колхоз Гӧрас ыбъясысь став боръяс, Медым некод оз ло тшыг. Лёк кулаклӧн сэки, Торйӧн, Пӧльтчис вом доръясас быг... Биӧн, пуртӧн да обрезӧн Лэптіс нянь вӧснаыс кось, Медым гӧля олысь грездыс Сылысь озырлун эз босьт. Но кыдз тувсов ытва нуӧ Берег вылӧ кольӧм ёг, Коллективӧн гӧрӧм муыс Чӧвтіс ас вывсьыс важ шог. Вождьӧн индӧм туйӧд мунны Кутіс водзӧ миян сикт. Некор паметьысь оз вунлы Сійӧ сьӧкыд, курыд луныс, Биӧн локтіс кор фашист... Сійӧ кӧсйис ставсӧ сотны, Босьтны миянлысь став му, Челядь шойясӧн тшӧтш потшны Аслас туй вылысь быд ю. Вӧльнӧй войтыр — абу рабъяс! Тышын киссис уна вир, Но ми сідзи кучким враглы — Черань паса сылӧн задъяс, — Весиг чегис сьылі дзир. Енэж вывсянь бара кисьтӧ Зарни шонді ассьыс гож. Миян олӧмнымлысь мичсӧ Ӧні аддзыліс кӧ вождь! Быдӧн зільӧ аслас уджӧн Коммунизмӧ тэчны пай. Кодыр кӧйдыс бара чужӧ — Воас озыр урожай! Быд удж бур, но кодлӧн вердӧ, Вася, тэнӧ лышкыд ки, Ыджыд аттьӧ пызан бердын Медводз сылы шуам ми. Кыпыд тулыс локтӧ таво, Муыс мамысь лоӧ шань... Сылы медся ыджыд слава Шуӧ Ленинлӧн держава, Сылы, Коді быдтӧ нянь!
