ТУРИЯС

Турияслысь горзӧм бара кыла,
Кымӧр сайӧд лэбӧны зэв ылӧ,
Аддза, кыдзи налӧн кокни вуджӧр
Сиктъяс весьтӧд ӧні бара вуджӧ.

	Лэбачьяслы шуда туй ми сиам,
	Колльӧдігӧн ӧвтам налы киӧн.
	Водзын уна муяс, уна юяс,
	Аддзысьлытӧдз, турияс, бур туйӧн!

Бордъясыслы сынӧд абу дзескыд,
Водзӧ лэбны туйыс налӧн веськыд,
Лэбӧны и асылын и войын,
Тӧлысьыс кор кӧдзыд югӧр койӧ.

Кодзувъясӧдз мусянь абу матын,
Кымӧр ӧтнас лӧня кывтӧ-катӧ...
Муным чӧскыд унмӧн важӧн узьӧ,
Турияс оз тӧдны некор мудзӧм.

	Лэбачьяслы шуда туй ми сиам,
	Колльӧдігӧн ӧвтам налы киӧн.
	Водзын уна муяс, уна юяс,
	Аддзысьлытӧдз, турияс, бур туйӧн!