* * *

Медся сьӧкыд сэки овны,
Кодыр йӧзлы он кут ковны,
Ин он аддзы,
Шуд он аддзы,
Ёрткӧд паныдасьны яндзим.
Весиг югыд тувсов шонді
Аслас югӧрнас оз шонты,
Йӧзлы муса сӧмын сійӧ,
Кодлӧн сьӧлӧм ӧзйӧ биӧн,
Коді удж вылӧ и тышӧ
Мунӧ веськыда, оз кытшовт.
Висьтав ачыд ӧні стӧча,
Мый да кодлы бурсӧ вӧчан,
Кыдзи гӧран,
Кыдзи ытшкан,
Коркӧ пӧсявлӧ-ӧ мышкыд?
Асьтӧ он кӧ сьӧктӧд уджӧн,
Кыдзи тӧдан мӧдлысь нужа?

Медся сьӧкыд сэки овны,
Кодыр йӧзлы он кут ковны!