* * *

Нимлунӧс пасйыны ме ордӧ кеж,
Дзик нинӧм сьӧрсьыд эн вай.
Ёртӧс став му вылас нинӧм оз веж,
Другӧс оз ньӧб зарни шайт.

Вокъяс моз пуксям да казьтыштам ми
Бӧрӧ нин кылалӧм лун,
Кор автоматъясысь вувзьысьӧм би
Вундывліс дженьыдик ун.

Мортыдлӧн зэв пыдын поздысьӧ лов.
Шонтывліс сійӧс и лым...
Дзебсьыны талун блиндажӧ оз ков, —
Мед юргӧ тулысся гым!

Збыльысь кӧ гымыштас...
Нинӧм эн шу,
Сувт командарм бердӧ чӧв;
Сійӧс, код вӧрзьӧдас миянлысь му,
Чышкыштас вынйӧра тӧв.

Киясным вӧчлісны быд сикас удж,
Кисьтлім и ньылӧм, и вир.
Му вылын кокниа некор оз чуж
Шондіысь сӧстӧмджык Мир!