ДАС ӦТИ ЗОН ЙЫЛЫСЬ БАЛЛАДА

Сиктын быдмисны дас ӧти зон,
Быдӧн на пӧвстысь статя да ён:
Куим Микол, кык Петыр да Миш,
Митипор, кык Егор да кык Гриш.
Ӧти пӧрӧдіс пармаын вӧр,
Мӧд зон радейтіс агас да гӧр,
Коймӧд весь овны сідз жӧ эз куж, —
Быдӧн ичӧтсянь радейтіс удж:
Куим Микол, кык Петыр да Миш,
Митипор, кык Егор да кык Гриш.
Воис зонъяслы гӧтрасян кад,
Но лёк враг торкис олӧмлысь лад:
Ӧти-мӧд бӧрся, — тӧданныд он?—
Бойӧ мунісны дас ӧти зон:
Куим Микол, кык Петыр да Миш,
Митипор, кык Егор да кык Гриш.
Шогсьӧ Эжвакӧд тшӧтш чужан вӧр:
Зонъяс гортаныс эз воны бӧр,
Весиг висьтавны некод оз куж,
Кӧні корсисны аслыныс гу:
Куим Микол, кык Петыр да Миш,
Митипор, кык Егор да кык Гриш.

Кыа сикт весьтас важысь на сэзь,
Пемыд кымӧрлысь вуджӧр оз лэдз.
Медым му вылын пыр вӧлі мир, —
Найӧ сы вӧсна кисьтісны вир:
Куим Микол, кык Петыр да Миш,
Митипор, кык Егор да кык Гриш.
Найӧс казьтывны кутасны нэм,
Паметь на йылысь кадыс оз вен.
Орччӧн сувтісны, — аддзанныд он? —
Некор кувлытӧм дас ӧти зон —
Куим Микол, кык Петыр да Миш,
Митипор, кык Егор да кык Гриш.