МЕНАМ КЫВ
Он вермы овны чӧв, кор сьӧлӧм ачыс корӧ, Кор колӧ сёрнитны, кор колӧ шуны кыв, Мед ӧти полюссянь мӧд кӧдзыд полюс дорӧдз Народъяслӧн оз ланьтлы гӧлӧс шы. Войналӧн вуджӧр кыптӧ му шар весьтӧ Да кӧсйӧ мырддьыны и челядьлысь лӧнь ун, И югыд шонді, миянлысь выль песняяс, И прӧстӧй йӧзлысь олан гаж да шуд. Эз косьмы кӧть на мамъяслӧн пӧсь синва, И казьтывлӧ на асьсӧ вӧвлӧм шог, А долларъяс кодь гырд да лэчыд синмӧн Дась ӧні сотны мусӧ Вашингтон. Рӧзбойник нюжӧдӧ нин бара ассьыс кияс, Мед выльысь кисьтны мортлысь дона вир, Пхеньянӧс моз жӧ ставнас сьӧд руинаӧдз Напалмӧн сотны менсьым югыд мир. Войнатӧг ирӧдъяслы олӧм — абу олӧм, Оз киссьы сейфъясӧ кӧ долларъясысь зэр... Вот сы вӧсна фашиствуйтысь выль Молох Уранӧн ышнясьӧ пыр сотны менсьым грезд. Но миян воля атомысь на ёнджык, И мусӧ пыркӧдӧ миллионъяс воськов шы. Мир видзны сувтӧ миян шуда томлун, Хикметлӧн стих, Нерудалӧн пӧсь кыв; Гимн дружбалы Поль Робсон гора сьылӧ, Шуд вӧсна тышкасьӧ пыр Ким Ир Сен, И смертьлысь поезд сувтӧдӧ туй вылын Французскӧй нывбаба Раймонда Дьен. И сьӧд, и еджыд кыпӧдчӧны орччӧн — Техасысь негр, Вьетнамысь том салдат. Быд кыв вылын, и мулӧн дзик быд помсянь Прӧстӧй народыс требуйтӧ Мир Пакт. Ми требуйтам, ог сы вӧсна, мый слабӧсь: Оз кувлы Сталинградӧс доръян лун... Ми требуйтам, мед олӧмыслысь радлун Войналӧн бушков му вылысь эз ну. Ме — пи народлӧн, коді созидайтӧ И будущӧйӧ тэчӧ кӧрт да из, Мед вывлань кывтіс миян югыд зданье, Мечтаысь лои збыльӧн коммунизм. Сё шонді ӧзйис миян синъяс водзын, Зэв гырысь стройкаясӧн шызис паськыд му, И Кремль весьтын рубинӧвӧй выль кодзув Став мирнӧй йӧзлы индӧ югыд шуд. Ми мӧвпалам и радейтам, и сьылам, Став йӧзлы мыччам дружбалысь пӧсь ки... И сы вӧсна ӧд миян радлун вылӧ Пурт тӧчитӧ Чикагоса мясник! Мед миян гӧлӧс биӧн сотас найӧс Да пӧртас пӧимӧ, код бара пестӧ би. Мир вӧсна тышӧ кыпӧдчам дзик ставӧн Да некодлы ог сетӧй кисьтны вир!
Гижӧд
Менам кыв
Жанр: 

lkejrlkelkrgner klrjnelknfrkl ekjnrjkenfrej

1