ДРУЖБА ЙЫЛЫСЬ БАЛЛАДА
Войвылын кывлі ме сы йылысь висьт, Вошліс кыдз тундраын геодезист. Кӧкъямыс асыв и кӧкъямыс вой Кыссис кын эрд вывті миян герой. Тундраыс чӧв олӧ, ланьтӧма дзик, Сы весьтын — кӧдзыд сияньелӧн мич... Кытчӧ нӧ сетчан да веськӧдан туй, Некод кӧ мортыслысь мудзсӧ оз юк? Ӧкмысӧд лунӧ нин кокыс эз ну, — Вошӧм полярникӧс аддзис пастух. — Мунам вай мекӧд, ме лоа тэн ёрт, — Комиӧн сёрнитысь шуис сэк морт. — Чумын тэ аддзан и шойччӧм, и нянь, — Татшӧм обычай эм важысянь тан... Босьтіс да сывъяліс кагаӧс моз Сійӧс, код ньӧжйӧник горӧдіс: — ... ё-ёрт! Нуис пастух сійӧс ас вылас дыр, Кытчӧдз став эбӧсыс аслас эз быр. Чумӧдз жӧ вӧлі на зэв уна шор, Кодъясӧс некор эз лыддьывлы морт. — Тэнӧ ог эновт ме... — шуис пастух, — Тундраын ӧні он сгинит, он кув!.. Кор налӧн помасис зэв ыджыд туй — Висьтавны тӧлкӧн мен некод эз куж... Аддзылі ачым Полярнӧй Урал, — Изйысь да кымӧрысь кыпӧдчӧм вал. Виччысьтӧг топӧдіс сэн менсьым ки Тундраӧ ылавлӧм геодезист; Сыкӧд жӧ вӧлі и коми пастух, Дзикӧдз нин мустӧммис кодлы важ чум, Вӧліны сэні ханты да манси — Муса отчизналӧн куим бур пи. Шуи сэк аслым ме: — Тэ кӧ поэт, — Сьӧлӧмсьыд пӧсьлунтӧ дружбалы сет, Коді Ураллӧн гранитысь на ён, Кодлы оз во тайӧ му вылын пом.
Гижӧд
Дружба йылысь баллада
Жанр: 

lkejrlkelkrgner klrjnelknfrkl ekjnrjkenfrej

1