КОР РУД АСЫЛЫС ЛЫМ ЧИРЪЯС КӦДЗӦ

Кор руд асылыс лым чиръяс кӧдзӧ,
Ышмӧм турӧбыс пальӧдӧ ун,
Сьӧлӧм шуӧ мен: вӧр лэдзысь, водзӧ,
Смела бушковлы паныд пыр мун;

Паныд бушковлы мун, кыдзи бойын
Ветлін чорыд атакаӧ тэ.
Ӧні вӧр вӧсна тышын ён сойтӧ
Мудзлун некор мед сідзжӧ оз вен.

Сьӧлӧм медбура тӧдӧ ӧд ставсӧ:
Кара-Кумыын шобді оз чуж,
Миян ыджыд стахановскӧй слава
Тайӧ ягсянь кӧ сэтчӧ оз вудж.

Колӧ тэныд веж зарниыс сталь моз
Йӧзлы кыпӧдны керка да цех,
Колӧ быдтыны му вылын няньлысь
Ӧти шеп пыдди кӧкъямыс шеп.

Медым асылыс лым чиръяс кӧдзӧ,
Ышмӧм турӧбыс пальӧдӧ ун.
Асъя кыакӧд кыпӧдчӧ водзын
Ещӧ мичаджык, долыдджык лун!