НОВОСЕЛЬЕ
Тайӧ сэн, кӧні ягвывса пожӧм Вывлань шыбитіс ассьыс веж ки, — Выль посёлокын, ылі Лунвожын Новоселье справляйтӧ лучкист. Став рӧдня сылӧн чукӧрӧ локтіс — Тракторист, моторист, бригадир. Гажа песняӧн чойяс да вокъяс Том кӧзяинкӧд восьтісны пир. Югыд керкаын пызаныс чегӧ; Кодлы мый колӧ — сёйышт да ю. Кытысь ставыс кӧзяинлы шедіс, Некод юасьны сылысь эз кут. Ӧти сувтіс бокалӧн юр весьтын: — Юа сы вӧсна, — горӧдіс, — ме, Тувсов дзоридз кодь мича невеста Керка пос вомӧн воськовтас мед. Мӧдлы висьтавны кӧсйыссис уна, Но эз куж сёрни помавны зон... — Юа сы вӧсна, — челядьлӧн шумыс Медым гажӧдас тэнсьыд выль дом. Коймӧд сиис, мый сьӧлӧмас пуис, Вӧзйис уджын кӧзяинлы шуд. — Юа сы вӧсна, — гораа шуис, — Медым некор эн тӧдлы тэ мудз! Том лучкист юрсӧ кыпӧдіс вылӧ, Кисьтіс гӧстьяслы нёльӧд бокал. — Ыджыд аттьӧ кыв висьтала сылы, Коді ловзьӧдіс миянлысь яг; Юам сы вӧсна, сьӧлӧмъяс пытшкын Кодлысь образсӧ новлӧдлам век. ...Мича стен вылын, ньыв лапъяс кытшын, Дона Сталинлӧн вӧлі портрет. Аслас шувгӧмӧн ягвывса пожӧм Йӧзлы тӧдмӧдӧ радостнӧй висьт: Выль посёлокын, ылі Лунвожын Новоселье справляйтіс лучкист.
Гижӧд
Новоселье
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1