КНЯЖПОГОСТ

Талун тэ дінӧ велалі ме:
Быттьӧ тайӧ лӧнь войвывса сынӧд
Югыд асылӧ кояліс век
Выль заводъяслысь гудыр-сьӧд тшынсӧ.
Ме ог юась, кӧн Памалӧн гу,
Кыті вольница ветліс набегӧн;
Аддза талун кыдз сӧдз Емва ю
Лэптіс ас вылас
Кӧрт послысь мегыр.
Тайӧ тэ, Княжпогост,
Менам аския кар,
Аслад биясӧн меліа
Дзирдалан став енэж пасьта.
Тані ассьым Москва,
Тані лӧз Воркута
Водзӧ тӧвзьысь маршрутъясын
Гӧстьясӧн талун встречайта.
Вӧрлысь чӧвлунсӧ шызьӧдӧ
Гораа юргысь гудок...
Чужан му тайӧ юргӧмсӧ
Песня моз ылісянь кылӧ.
Эз ӧд кыйсьысьлӧн чом, —
Миян том Княжпогост
Кыптіс мойдвывса Памалӧн
Важӧн нин вунӧм гу вылын.
Миян кадыс поэмаяс
Виччысьӧ тэсянь, поэт,
Дона мулысь выль лун
Мича стихъясын славитны-гижны.
Паськыд парма просторъясын
Нюжалӧм дзирдалысь рельс
Ыджыд нэмлы выль летопись
Войвывса вӧр-ваын гижтіс.
Емва берегын сулала ме
Ыджыд шудлунӧн тыр,
Сэн,
Кӧн йӧралысь коктуйсӧ
Видзӧ веж ягыслӧн морӧс.
Мед душаӧй охотниклӧн, —
Войвывлӧн талунъя шы
Паровознӧй гудокъясӧн
Ас дінас век кежлӧ корӧ.