* * *

Юалі ме тэрыб бордъя тӧвлысь:
— Мый тэ пӧльтан югыд гожся лунӧ?
Вочавидзис: — Кымӧръяс ме кӧвта
Койыштны пӧсь ваӧн йӧзлысь мусӧ.
Кыптіс енэж вылын ӧшкамӧшка.
— Нюжӧдін тэ мыйла зарни асык?
— Юкмӧс тіян сиктын мед оз косьмы,
Сійӧн юа азыма ме васӧ.
Улич вылӧ петі югдандор ме,
Асыввылын шондіыс кор чужӧ.
— Мыйла, — сылысь юася, — он сёрмы,
Радейтны дзор мусӧ ӧтмоз кужан?
Шонді ассьыс югӧр ылӧ резіс,
Нюммуніс да окаліс тшӧтш менӧ;
Аддзылі, кыдз удал зонъяс грездысь
Лысва вылысь зарни югӧр везъяс
Коялісны косаясӧн сёнӧ.