БИА ӦГЫР (ЯКОВ ИВАНӦВИЧ ЧУПРОВ)

Чужи ме 1906ʼ воын март тӧлысьын 21ʼ лунӧ, Букур вӧлӧсьтын (Изьва-Печӧра у.). Батьӧй — гӧль крестьянин.

Велӧдчылі сиктса ичӧт школаын куим во (9-сянь 12 арӧсӧдз). Сы бӧрын уджалі асланым овмӧсын 1924ʼ воӧдз.

1919–20’ воясӧ пышйылім белӧйясысь Эжва вылӧ став семьяӧн.

1921ʼ воын пыри комсомолӧ.

1924–27 воясӧ велӧдчи сӧвет партия уджӧ велӧдан школаын (совпартшколаын), кыкнан ступеняс.

Комиӧн гижны окота вӧлі зэв томысянь, мыйкӧ вӧлі кыскӧ менӧ сійӧ уджас. Сӧмын йӧзлы сы йылысь некор эг висьтавлы: кысь нин, мися, ми кодь омӧлика велӧдчӧм йӧзыдлы гижны. Мукӧддырйи вӧлі бумага вылӧ гижлывла мыйсюрӧ да, сэсся яндзимла бӧр косявла. Ӧтчыд кыськӧ ичӧтдырйи сюрис ӧти лист кутшӧмкӧ коми азбукаысь да. Ме сійӧс киссьытӧдзыс лыддьывлі. Ӧні на мыйсюрӧ тӧда сійӧ гижӧдсьыс: гижӧма вӧлі „Утка сьылі кузь“ да мый да.

Ёнджыкасӧ гижны босьтчи 1926 восянь. Сыысь войдӧр коръясынкӧ гижлывлі сӧмын стенӧ ӧшӧдан газетӧ. Менам коми гижӧдъяс петавлісны „Коми Сикт“ газетын да „Ордым“ журналын.

Ӧні, кор казялі да аддзыны куті коми йӧзлы коми гижӧд колӧмсӧ, гижны куті сьӧлӧмсянь, воддза моз яндысьтӧг, повтӧг.

Таво гожӧмсяньыс уджала тундраын, яранъяс пӧвстын.