ДАС ВО


Дас во тыри ас вӧснаным вермасьӧмлы да ас вӧляным уджалӧмлы. Дас во му вылын квайтӧд юкӧнас рабочӧйяс да крестьяна асьныс аслыныс тэчӧны выль бур олӧм, зумыда тувччалӧны асланыс веськыд туйӧд. Дас во чӧж квайтӧд юкӧнсяньыс став му пасьтала сявкйӧ тільсьысь-пессьысь йӧз пӧвстӧ бикинь, ӧзйӧдӧ ыджыд колан би. Дас во нин му вылын восьтӧма паськыда, дзир йывтіыс социализмланьӧ петан ӧдзӧс.

1917ʼ воын октябр 25ʼ лунӧ (выль ногӧн ноябр 7ʼ лунӧ) Питирын рабочӧйяс да салдатъяс, большевикъяс партия чуксалӧмӧн да туйдӧдӧмӧн, петісны ывла вылӧ ӧружйӧӧн корсьны аслыныс праваяс, шыбитісны капиталистъяслысь власьт. Большевикъяслӧн войскаясыс кутісны Временнӧй правительствоӧс Зимней Дворецын, став министръяссӧ арестуйтісны. Сӧмын юралысьыс — эсэр Керенский удитіс пышйыны. Босьтісны ас кианыс став гырысьджык учрежденньӧяссӧ. Октябр 25ʼ лунӧ чукӧртчис Питирын Ставроссияса Сӧветъяслӧн мӧд съезд. Унджыкыс сэн вӧліны большевикъяс. Съезд шуис босьтны власьтсӧ ас киас, лӧсьӧдіс Рабочӧйяс да Крестьяна правительство. Юралысьнас сэтчӧ бӧрйис Ленин ёртӧс. Сы бӧрын кыпӧдчӧмыс пыр ӧтарӧ паськалі став Россия кузя.

Февральса революцияын рабочӧйяс да крестьяна корсисны войнаысь дугдӧм (мир), видз-му, нянь, вӧля. Власьтыс сэки коли капиталистъяс да помещикъяс киын. Найӧ нинӧм эз сетны уджалысь йӧзлы.

Сӧвет власьт пырысьтӧм-пыр сетіс уджалысь йӧзлы мый найӧ вӧлі корӧны. Ставроссияса Сӧветъяслӧн мӧд съездыс лэдзис декрет мир йылысь, декрет помещикъяслысь став видз-муяссӧ крестьяналы некутшӧм дон мынтытӧг сетӧм йылысь. Сідзи жӧ съезд шуис: быдпӧлӧс ас сёрниа йӧзлы позьӧ торйӧдчыны дзикӧдз, весиг дзик торъя государствоӧ. Ставроссияса коймӧд съезд вынсьӧдіс юӧртӧм уджалысь йӧзлы праваяс сетӧм йылысь (декларация прав трудящегося и эксплоатируемого народа).

Медколаныс да медыджыд сетӧмыс Октябрса революциялӧн, дерт, уджалысь йӧзӧн ас киас власьт босьтӧмыс да пролетариатлысь ыджыдалӧмсӧ лӧсьӧдӧмыс. Революция дзоньнас путкыльтіс, кисьтіс важ власьт ногсӧ. Важ власьт пыддиыс лӧсьӧдіс выль ногса власьт, Сӧвет власьт, сӧмын пролетариатлы да сы дор олысьяслы — крестьяналы бур вылӧ уджалан власьт.

Ми, коми йӧз, Октябрса революцияӧн ещӧ нин унджык босьтім. Ми ӧд сар дырйи вӧвлім, мукӧд ассикаса сёрниа йӧз моз жӧ, нартитана йӧз. Миянӧс роч сарлӧн власьт эз пуктывлы морт туйӧ, эз тшӧктыв аслыным асьнымӧс радейтны, морт пыдди овны. Октябрса революцияӧн перйӧм власьт, асланым власьт мӧд ногӧн лӧсьӧдіс. Миянлы ӧні сетӧма автономия. Ми ӧні вермам ас олӧмсям серти овмӧснымӧс лӧсьӧдны да кыпӧдны, вермам бурджыка югдӧдчыны.


Кутшӧм партия туйдӧдіс уджалысь йӧзӧс босьтны власьт.


Кутшӧм партия кольччис помӧдз рабочӧй класс дор? Кутшӧм партия нуӧдіс рабочӧйясӧс, гӧль крестьянаӧс Октябрса революцияӧдз, чуйдӧдіс найӧс босьтны ас киас власьт?

Видзӧдламӧ, кыдзи эсэръяслӧн (социал-революционеръяслӧн), меньшевикъяслӧн да большевикъяслӧн партияясыс сёрнитісны, Февральса революция бӧрын революция удж йылысь.

Медвойдӧр — кутшӧм ногса власьт (государственное устройство) ӧні колӧ?

Эсэръяс да меньшевикъяс шуӧны: буржуазияса парламента республика. Рабочӧйяслы да крестьяналы лӧсьӧдавны реформаяс.

Большевикъяс шуисны: рабочӧйяс да, салдатъяс да, крестьянаяс да, казакъяс депутатъяслӧн Сӧвет Республика. Став власьтсӧ Сӧветъяслы!

Кыдзи видзӧдісны социализм вылӧ?

Эсэръяс да меньшевикъяс тіньгисны: ми пӧ эськӧ сідзсӧ социализм дор да. Сӧмын ӧні мӧвпавны да вӧчны кутшӧмкӧ уджъяс социализм дорыд водз на.

Большевикъяс шуисны: ми социализм дор. Колӧ, мед рабочӧйяс да мукӧд депутатъяслӧн Сӧветъясыс пырысьтӧм-пыр зілисны вӧчны социализмланьӧ мунан удж.

Империализмса война дор али воча сылы?

Эсэръяс да меньшевикъяс: ми эськӧ воча империализмса войнаыдлы да, тайӧ, ӧнъя войнасӧ доръям.

Большевикъяс: дерт, ми воча мунам быд империализмса войналы, воча мунам став война нуӧдысь буржуйяс правительствояслы, тшӧтш временнӧй правительстволы.

Видз-муяс помещикъяслысь крестьяналы сетӧм йылысь эсэръяс да меньшевикъяс шулісны: бурджык лоӧ, крестьяна кӧ виччысьласны Учредительнӧй Собранньӧӧдз. Сійӧ мый шуас... Асныс пыр нюжӧдчисны Учредительнӧй Собранньӧсӧ чукӧртӧмысь.

Большевикъяс шулісны: колӧ видз-муяс помещикъяслысь босьтны пырысьтӧм-пыр. Сӧветъяс пыр лӧсьӧдны сы вылын чорыд пӧрадок. Тшыкӧдны скӧт, уджалан кӧлуй некутшӧма оз позь.

Эсэръяс да меньшевикъяс воча мунлісны и пабрик-заводъяс вылын рабочӧйясӧн видзӧдӧм (контроль) лӧсьӧдӧмлы, сэсся пабрик-заводъяссӧ государство киӧ босьтӧмлы.

Татысь позьӧ нин аддзыны: сӧмын большевикъяслӧн партияыс, Ленин ёрт чуйдӧдӧмӧн, нуӧдіс рабочӧй классӧс ӧтув судзсьытӧм крестьянакӧд Октябрса революцияӧдз. Сӧмын большевикъяс партияӧн нырщикалӧмӧн рабочӧйяс да крестьяна шеныштісны ас сьылі вывсьыныс помещикъясӧс да капиталистъясӧс, босьтісны ас кианыс власьт. Сӧмын большевик партия нуӧдіс дай нуӧдӧ рабочӧйясӧс да крестьянаӧс социализмӧ.

Эсэръяслӧн да меньшевикъяслӧн сямлуныс тырмӧ вӧлӧм сӧмын рабочӧйясӧс да крестьянаӧс ылӧдлӧм вылӧ, удж вылас воӧм мысти шыбитчисны капиталистъяс бердӧ.


Война вояс.


Октябрса революция бӧрын, Сӧвет власьт лӧсьӧдӧм бӧрын миян вылӧ быд боксянь уськӧдчисны ас муса капиталистъяс да генералъяс, тшӧтш эсэръяс да меньшевикъяс. Локтісны на бердӧ, йитчисны накӧд ставмувывса капиталистъяс, кӧсйисны артельӧн, понъяс моз, ньылыштны уджалысь йӧзлысь государство. Том Сӧвет Республикаӧс йӧртісны кытшӧ. Колӧ вӧлі рабочӧйяслы да крестьяналы пуктыны помтӧм вын, мед видзны ассьыныс перйӧмторсӧ. Колӧ вӧлі дзик став эмбурсӧ сетны война вылӧ. Лои пабрик-заводъяслы босьтчыны вӧчны военнӧй кӧлуй. Лои босьтавны крестьяналысь пӧшти став лишнӧй няньсӧ тшыгъялысь рабочӧйясӧс да ассьыным армияӧс вердӧм вылӧ. Война вӧсна став овмӧсным киссьыны кутіс: уна пабрик-заводъяс сувтісны ломтысян да уджалан кӧлуй тырмытӧмла, транспорт омӧльтчис, видз-муяс эндалісны уджалысьяс да скӧтъяс судзсьытӧмла. Лои быдӧнлы ёна тшыгъявны, нянь пыдди качьяс да жмыкъяс сёйӧмӧдз волім, кӧм-паськӧмысь дзескавлім. Вит во кыссис война. Вит во Сӧвет Республикаса уджалысь йӧз ӧружйӧӧн пыкисны ассьыныс государствонысӧ врагъясысь. Сӧвет власьтӧн дорӧм Гӧрд армия весаліс ас мусӧ капиталистъяс войскаысь. Тшыг нисьӧ пӧт, омӧль паськӧма, нетырмана ӧружйӧа Гӧрд армия веніс пӧт, шоныд паськӧма, кок увсяньыс юр вылӧдзыс ӧружйӧӧн вевттьысьӧм еджыд армияӧс. Капиталистъяс виньдісны миянӧн, бӧрӧ исковтісны. Шензис миян удж вылӧ став муыс. Нимкодясисны ставмувывса уджалысь йӧз, отсалісны миянлы. Ошйысям ми сійӧн? Ошйысям, дерт! Ми ӧд венім, ми кужим дорйыны ассьыным медводдза государствонымӧс.

Эсэръяс да меньшевикъяс тайӧ вояснас бара на петкӧдлісны ассьыныс „уджалысь йӧз дор тӧждысьӧмсӧ“. Найӧ кыпӧдлісны Ленинградын юнкеръясӧс революциялы паныд (1917ʼ воын, ІІ/ХІ). Найӧ, уджалысь йӧзлы революциясӧ вӧчны отсалӧм пыдди, корисны германияса генералъясӧс Украинаысь Сӧвет власьт бырӧдны. Найӧ ызйӧдісны Япониялысь войскасӧ локны (1918ʼ воын, мартын) Асыввыв Сибырӧ (Дальний Восток). Найӧ кокнысӧ нюлісны англияса войскалысь Кардорын. Найӧ кыпӧдчылісны Ярославльын Сӧвет власьт вылӧ (юльын). Найӧ кӧсйисны чышкыштны Сӧвет власьт Мӧскуаын юрнысӧ лэптылӧмӧн (юльын жӧ). Найӧ война воясӧ, сьӧкыд воясӧ жугӧдлісны посъяс кӧрт туйяс вылын, мукӧдтор, мед кыдзкӧ пановтны, омӧльтны уджалысь йӧзлысь капиталистъяскӧд тышкасьӧмсӧ. Найӧ Ленин ёртӧс заводитлісны вины. Помтӧм-дортӧм налӧн уджалысь йӧзлы мыж вӧчӧмыс. Дай ӧні на найӧ помала, капиталист государствоясӧн отсалӧмӧн, вӧчӧны ассьыныс „уджалысь йӧз дор“ уджнысӧ.


Овмӧс кыпӧдам.


Война помасьӧм бӧрын миян уджъяс ещӧ паськыда воссисны. Колӧ вӧлі ыджыд вын пуктыны киссьӧм овмӧс кыпӧдӧм вылӧ. Ньӧжйӧник, вочасӧн, воысь воӧ миян унджык да унджык пабрик-заводъясысь кутіс чепсасьны тшыныс, кӧрт туйяс, парокодъяс ловзьыны, муяс няньӧн тырсявны. Ми революциялы дас воыд кежлӧ ёна нин овмӧснымӧс лэптім. Ми воим овмӧснымӧн войнаӧдзса кад выйӧдз нин, промышленносьтын унатор вӧчӧмӧн весиг панйим.

Дерт, войнаӧдзса кад выйӧдз воӧм овмӧснад ми огӧ на сувтӧй. Миянлы овмӧснымӧс колӧ лэптыны ёна на вылӧ войнаӧдзса овмӧс сертиыд, колӧ вывті на бурмӧдны. Сӧвет Союз босьтчис ыджыд уджӧ: миян видз-му уджалан государство бергӧдны промышленносьта государствоӧ. Тайӧ уджсӧ ми ӧні вӧчам нин. Стрӧиталам выль пабрик-заводъяс быдсяма кӧлуйяс вӧчалӧм вылӧ, вӧчалам заводъяс промышленносьтлы да видз-му уджалӧмлы колана машинаяс вӧчавны. Ми вермим вӧчны Волховстрой. Ми кутчысим вӧчны Днепрострой, Семиреченскӧй кӧрт туй. Ми збыльысь нин гырысякодь нуӧдам социализма овмӧс дорӧм. Ми петам нин социализмланьӧ мунан паськыдджык туй вылӧ.

Сідзи жӧ миян ӧдйӧджык, сар дырйи дорысь, мунӧ водзӧ йӧзӧс югдӧдан удж. Школаяс войнаӧдз дорысь унджык, сэтчӧ паськыда восьтӧма туй сӧмын рабочӧйяслы да крестьяналы. Быд пельӧсын, весиг медпемыд сиктъясас эмӧсь ӧні лыддьысян керкаяс. Содӧны кинояс. Пыр ӧтарӧ ликмӧ йӧз бердӧ радио.

Миян коми муын дас воӧн сідзи жӧ вель водзӧ лои тувччӧма овмӧснымӧс кыпӧдӧмӧн, югдӧдчӧм удж паськӧдӧмӧн, сідзи водзӧ. Ми сы йылысь тайӧ журнал нумерас водзынджык гижим.


Сарлӧн власьтыс отсавліс али Сӧвет власьт ёнджыка отсалӧ уджалысь йӧзлы.


Сӧвет правительство ёна отсалӧ кыпӧдны промышленносьт да видз-му уджалӧм. Отсалӧ крестьяналы овмӧссӧ кыпӧдны: ӧтувтӧ кооперативъясӧ, удждӧ сьӧм, зільӧ донтӧгджык сетны видз-му уджалан машинаяс, донтӧммӧдӧ пабрик-заводса тӧвар, кокньӧдӧ налогъясысь, сідзи водзӧ.

Видзӧдламӧ, кыдзи отсасьліс сар правительство да кыдзи отсалӧ Сӧвет правительство уджалысь йӧзлысь олӧмсӧ быд боксянь бурмӧдны.

Сарлӧн правительствоыс унджык докодсӧ (60% гӧгӧр) аслас бюджетас чукӧртліс вотъясӧн. Миян бюджетын, шуам, 1926–27 воын докодыс вотысь вӧлі 47%. Сардырся да ӧнія вот босьтӧмыс дзик мӧд нога. Сӧвет власьт зільӧ унджык вотсӧ перйыны озырджыка олысьяслысь, судзсьытӧма олысьлысь зэв этша босьтӧ либӧ дзикӧдз мездӧ.

Со, шуам, 1926–27 воын видз-му вот вӧлі 300 миллион шайт. Сыысь джын гӧгӧр сьӧмсӧ мынтісны став крестьяна овмӧс письыс 14%-ыс (ёнджыка судзсяна олысьяс). 20% овмӧсъяс пиысь вотысь мездӧма вӧлі дзикӧдз (судзсьытӧма олысьясӧс). Сар дырйи унджык вотыс перйыссьыліс уджалысь йӧзлӧн. Со, босьтам, 1913ʼ во. Сэки уджалысьлысь быд 100 шайт нажӧткаысь босьтісны 14 шайт 30 ур. Помещикъяслысь, пабрикантъяслысь, тӧргӧвечьяслысь быд 100 шайтысь босьтісны 10 ш. 90 ур. Капиталистъясыд и сы мында вотсӧ ас зепсяньыс эз мынтывны. Вот донсӧ найӧ вӧлі сюясны тӧвар донас дай сійӧ вотыс бара жӧ водас ньӧбысь вылӧ — уджалысь вылӧ. Сэсся сар правительствоыд зэв уна вот босьтліс уджалысь йӧзлысь акцизъясӧн (йӧзлы колан тӧваръяс вылӧ налог пукталӧмӧн).

Сар правительствоса бюджетысь (1913ʼ восяысь) сьӧмсӧ лэдзлісны йӧзлы ёна колантор вылӧ (югдӧдчӧмлы, дзоньвидза кутӧмлы, видз-му уджалӧмлы, сідзи водзӧ) сӧмын 10%-сӧ гӧгӧр. Сы вылӧ миян бюджетысь (1925–26ʼ восяысь) сетлісны 30%-сӧ гӧгӧр.

Ми кӧть олам капиталист государствояс кытшын, СССР-ӧс дорйӧм удж вылӧ 1925–26 вося бюджетысь сетлім 16,5%-сӧ, а сар правительство 1913ʼ вося бюджетысь видзӧма армия вылас матӧ 30%-сӧ.

Сӧвет Союзлӧн рӧскодъяссӧ бюджетсьыс лӧсьӧдӧны сідзи, мед унджык сьӧмыс мунӧ овмӧс вылӧ, югдӧдчӧм вылӧ, уджалысь йӧзлы мукӧдтор колантор вылӧ, а сар правительство бюджетын мӧдарӧ (со, 1913 воын пӧлича вылӧ, судъяс, тюрмаяс, вичкояс да попъяс вылӧ видзӧмаӧсь 346 миллион шайт — 10% саяс став бюджетсьыс, удждысьӧмъясысь % % мынтӧм вылӧ — 424 миллион шайт — 12% саяс. Куш сар семьяыс вылӧ быд во мунлӧма 17 миллион шайт — 50 сюрс шайтӧн лун).


Водзӧ кежлӧ миян уджыд ёна на уна.


Октябрса революциялы мӧд дас во вылӧ петігӧн Сӧвет власьтлӧн, став уджалысь йӧзлӧн эмӧсь зэв жӧ гырысь выль уджъяс. Миянлы колӧ став овмӧснымӧс бергӧдны социализмӧ мунӧм вылӧ. Сы вӧсна колӧ паськӧдны, ёнмӧдны промышленносьт, лэптыны сы выйӧдз, мед сійӧ сетіс уджалысь йӧзлы дзик став коланторъяссӧ дай сетіс донтӧгджык, мед асланым промышленносьт вӧчаліс пабрик-заводъяслы да видз-му уджалӧмлы колан машинаяс. Колӧ бурмӧдны да паськӧдны видз-му уджалӧм, вуджны выль ногӧн, кокньыдджыка уджалӧмӧ — уна переменаӧн, машинаясӧн, весиг электричествоӧн. Колӧ паськӧдны вӧр лэдзӧм.

Коммунист партия да Сӧвет власьт отсалӧны крестьяналы кооперацияӧ ӧтувтчыны. Кооперация колӧ паськӧдны, бурмӧдны крестьяна пӧвстын. Кооперация пыр ӧд сӧмын ми вермам кыскыны сиктса овмӧсъястӧ социализмад.

Миян Сӧветъяслы колӧ нуӧдны зэв ыджыд удж: став олӧмсӧ бергӧдны социализмланьӧ мунан туй вылӧ. Сійӧс ми вермам нуӧдны, кутам кӧ кыскыны сӧветъясас, найӧ уджас унджык уджалысь йӧзӧс, кутам кӧ ми пыр ӧтарӧ ловзьӧдны сӧветъяслысь уджсӧ, матыстны йӧз бердӧ. Миян партия чорыда босьтчис удж нуӧданінъясысь бюрократизм вужнас нетшыштны. Тайӧ уджсӧ нуӧдны колӧ быд мортлы отсасьны.

Миян овмӧс кыпӧдӧмлы колӧ уна сьӧм. Сӧвет правительство сы вӧсна лэдзлывлӧ воана заёмъяс. Сэсся уджалысь йӧз отсалӧны государстволы тайӧ уджсӧ (овмӧс кыпӧдӧмсӧ) паськӧдны сьӧм чӧжан кассаяс пыр. Крестьяналы колӧ ассьыныс чӧжсьыштӧм да прӧст сьӧмсӧ сетны заёмъясӧ, пуктыны сьӧм чӧжан кассаясӧ. Сыысь бурыс воӧ аслыныс крестьяналы дай тшӧтш государстволы.

Партия да Сӧвет власьт тшӧктӧны донтӧгджык сетны крестьяналы пабрик-заводса тӧваръяс.


Капиталист государствояс миян вылӧ зырсьӧны.


Миян кыптӧмным, овмӧс бурмӧдӧмным, социализмлань мунӧмным оз во сьӧлӧм выланыс ставмувывса дась нянь сёйысьяслы — капиталистъяслы. Найӧ пыр зыртчӧны миян вылӧ. Бӧръя кадъяснас ещӧ нин тӧдчанаӧн петкӧдлӧны ассьыныс лӧглунсӧ. Капиталистъяс явӧ моз кутісны лӧсьӧдны миян вылӧ война. Миян мог Октябрса революциялы мӧд дас во вылын важ ног ёнмӧдны Гӧрд армияӧс, паськӧдны ОСО-Авиахимлысь уджсӧ, сы пыр тӧдмасьны военнӧй уджӧн. Миянлы весиг ӧти здук кежлӧ, удж вылын ни, шойччиг ни оз позь вунӧдчывны: ми олам капиталист государствояс пӧвстын, найӧ коркӧ уськӧдчасны миян вылӧ. Мед ми пыр вӧлім лӧсьӧдчӧмаӧсь асьнымӧс дорйыны. Сэки некутшӧм вын миянӧс оз вермы путкыльтны. Сэсся ӧд и ставмувывса уджалысь йӧзыс миян дор олӧны. Ставмувывса уджалысь йӧз пыр ӧтарӧ вежӧрмӧны, казялӧны код бӧрся налы колӧ мунны, матысмӧны Коммунист партияяс бердӧ, сувтӧны Коминтерн гӧрд дӧрапас улӧ.

Талун тыри дас во Октябрса революциялы — миян мездлунлы. Ми вуджим дас во асьным ас вылын ыджыдалӧмӧн, ас вылӧ тільсьӧм-пессьӧмӧн. Дас воӧн ми став муыслы чуймымӧн уджъяс вӧчим. Мед гӧгӧрвоан, кутшӧм водзӧ ми, бӧрӧ кольӧм няйт пемыд важ Россияса уджалысь йӧз, тувччим, колӧ видзӧдлыны дас во сайӧ, мӧвпыштны мыйӧн ми заводитчим овны, мыйӧн ӧні ми олам.

СССР-са рабочӧй класс ӧтув гӧль да шӧркоддьӧма олысь крестьянакӧд, Коммунист партия чуйдӧдӧмӧн, дас во чӧж ковгӧ-дорӧ выль нога олӧм, сӧмын тільсьысь-пессьысь йӧзлы колана олӧм. СССР-са рабочӧйяс да крестьяна петкӧдлісны: найӧ пелькӧдӧны важ нога обществолысь лёк олӧмсӧ, сир курыд шог няйт олӧмсӧ, — найӧ дорӧны социализм. Сӧвет Союзса уджалысь йӧз Октябрса революциялы дас во тыран лунӧ ещӧ на петкӧдласны: найӧ ас муас вермасны дорны социализм. Уджалысь йӧзса медводдза государствосянь рабочӧйяс да крестьяна дасӧд Октябр колльӧдігӧн ещӧ на гора, ещӧ на збоя, став муыслы кывлымӧн, чукӧстчасны: „Ми нуӧдам ставмувывса Октябр!“ Ставмувывса тільсьысь-пессьысь ёртъясыс налы шыасясны: „Ми кыпӧдам ставмувывса рабочӧй революция!“

Талун став му вылас уджалысь вокъяс да чойяс пӧвстын юргӧ:

Мед олас дасӧд воыс Октябрса революциялӧн!

Чолӧм СССР-са уджалысь йӧзлы, найӧс чуйдӧдысьлы — Коммунист партиялы!


Эн пӧ.


Гижӧд
Дас во
Пасйӧд: 

Авторыс Эн Пӧ.

lkejrlkelkrgner klrjnelknfrkl ekjnrjkenfrej

1