КОМСОМОЛЛӦН МОГЪЯСЫС ВИДЗ-МУ ОВМӦС КЫПӦДАН УДЖЫН


Сиктса комсомол ячейкаяслӧн гожӧмын медыджыд уджыс видз-му бердын. Видз-му овмӧс кыпӧдан да бурмӧдан удж нуӧдӧмнас сиктса комсомолечьяс пуктӧны ассьыныс пайсӧ выль олӧм, социализма олӧм вӧчӧм вылӧ.

Мый вылӧджык гожӧмнас да тулыснас коми сиктса комсомол ячейкаяслы колӧ ёнджыка видзӧдлыны? Уна вӧлӧсьтъясын да сиктъясын таво мунны кутасны му юклӧмъяс.

Революция бӧрын тыр муяс вешталӧмъяс эз вӧвны 42 вӧлӧсьтын. Сэтшӧминъясад татшӧм кузь кадъяснад мукӧд овмӧсъясысь йӧзыд быри, мукӧдлӧн ёна соді. Мукӧдлаын му юклӧмъясыд эськӧ и вӧліны, да муяссӧ торйӧдлісны зэв уна пельӧ, — некутшӧм тӧлк, бара, эз ло. Дерт, унджык муа да этша семьяа крестьянаыд кутасны воча мунны му юклӧмыдлы. Сэки и ковмас комсомол ячейкаясыдлы асьнысӧ петкӧдлыны — судзсьытӧм крестьяна вӧсна тӧждысьыштны. Колӧ босьтчыны войдӧр гӧль да шӧркоддьӧма крестьяна костын заводитны сёрни нуӧдны му юклӧм йывсьыс, висьтавны налы кутшӧм законъяс та йылысь эмӧсь. Унджык йӧзыс кӧ сиктад босьтчасны му юклӧмӧ, дерт, ӧти-мӧдыд юклысьӧмъяслы паныд мунысьясыд нинӧм оз вермыны вӧчны, оз вермыны сувтӧдны уджсӧ. Муястӧ юклігӧн колӧ ёна зільны, мед эськӧ бырӧдны посни пельӧ да мӧда-мӧдсьыс ылӧ муястӧ юклысьӧмъясысь.

Мукӧдлаын крестьяна зільӧны куим переменаа му вӧдитчӧмысь эновтчыны, заводитны мусӧ вӧдитны уна переменаӧн.

Сӧмын тані бара торкӧ став тӧлксӧ уна да посни пельӧ му юклӧмъясыд, либӧ мыйкӧ ещӧ мукӧдтор. Татшӧминъясад колӧ мӧвпыштны землемерӧн юклысьӧм йылысь. Та дырйи, дерт, ковмас унджык сьӧм да унджык вын пуктыны. Да ӧд бурыс унджык жӧ и лоӧ, сэсся комсомол ячейкаяслы колӧ сёрни нуӧдны, мед эськӧ крестьянаыс босьтчисны унджыкӧн уна переменаа му вӧдитӧмас.

Кыдзи, кутшӧм переменаӧн лӧсьыдджык муястӧ вӧдитны, колӧ юасьны агрономлысь.


Видлӧгъяс.


Зэв уна крестьяна гаралӧны мукӧддырйи кутшӧмкӧ выльторъяс вӧдитӧм йылысь. Сӧмын полӧны — ӧти сёрни кузяыд пӧ огӧ лысьтӧ вӧчнысӧ. Кодкӧ кӧ пӧ эськӧ видлӧг вӧчис, петкӧдліс миянлы, сэки пӧ позяс босьтчыны.

Эмӧсь наросьнӧ видлӧг вӧчан станцияяс. Найӧ быдсяма пӧлӧс видлӧг вӧчӧны видз-му уджалӧм боксянь, уна бур индӧдъяс вермасны сетны крестьянаыдлы. Сэтшӧм станцияясыс корсьӧны крестьяна пытшкысь гижысьясӧс (корреспондентов).

Комсомолыдлы колӧ босьтчыны и тайӧ удж дінас. Комсомолечьяслы да видз-му велӧдан кружокса шленъяслы колӧ заводитны вӧчавлыны видлӧгъяссӧ, сэсся гижасьны видлӧг станцияяскӧд.


Турун да мукӧдтор кӧдзӧм.


Ӧні уна крестьяна нин заводитӧны муяс вылас кӧдзны турун, мӧс сёркни, картупель. Сы дінӧ сиктса комсомоллы бара жӧ колӧ босьтчыны. Таво колӧ нин унджык комсомолечлы да видз-му велӧдан кружокса шленлы заводитны кӧдзны ас муяс вылас турунъяс, картупель, мӧс сёркни. Кӧні кольӧм во видлӧг мый йылысь кӧ артмис, таво колӧ ёнджыка сы дінӧ босьтчыны, мед бур вӧчӧмторйыс вермис ёнджыка паськавны.

Мукӧдлаын ӧзимъястӧ да няньястӧ зэв ёна тшыкӧдлӧны гагъяс. Сэсся овлӧны нянь висьӧмъяс. Кӧні таво татшӧм нелючкиясыс лоӧны, комсомол ячейкаяслы ӧтув агрономкӧд колӧ вермасьны сыкӧд, висьтавлыны крестьяналы — кыдзи колӧ вермасьны.

Колӧ жӧ комсомолыдлы видзӧдны, мед омӧль потшӧс вӧсна кӧдзаястӧ эз таляв скӧт. Быд комсомолечлы войдӧр ассьыс потшӧсъяссӧ колӧ видлыны — бурӧсь-ӧ. Колӧ отсавны исполкомлы, мед эськӧ быд крестьянинлӧн потшӧсыс вӧлі ён. Гӧлиник крестьяналы, оз кӧ найӧ ас выннаныс вермыны лӧсьӧдны ассьыныс потшӧсъяссӧ, колӧ сетны ӧтувъя уджӧн отсӧг.


Овмӧстӧ колӧ артавны.


Артыштӧм да пасйыштӧм кӧ абу овмӧсад, он вермы тӧдны — уна-ӧ овмӧсыд пӧльза либӧ убытка вайӧ. Тайӧ уджтӧгыд быттьӧ ми син куньӧмӧн мунам. Артыштӧмтӧ да пасйыштӧмтӧ вӧчны, карандаш да бумага кындзи, нинӧм сэсся оз ков. Быд комсомолечлы колӧ аслас овмӧсын нуны пасъялӧмсӧ (учёт). Кыдзи, мый, кутшӧм кадын вӧчин, уна-ӧ уджсӧ пуктін, — овмӧсад ставсӧ колӧ артыштны.


Ас овмӧсас юралысь комсомолечлӧн могъясыс.


Видз-му кыпӧдан уджад медыджыд могыс воӧ овмӧсас юралысь комсомолеч вылӧ. Ӧні ас овмӧсас юралысь комсомолечьяс быдлаын (сідзжӧ и миян обласьтын) чукӧртчывлӧны сёрнитны ас костаныс да агрономъяскӧд видз-му уджалӧм йылысь. Сэтшӧм чукӧртчылӧмъяс вылас колӧ корлывлыны тшӧтш и мукӧд (ас овмӧсас не юралысь) комсомолечьясӧс. Колӧ жӧ сэтчӧ корлывны выль ногӧн видз-му уджавны зільысь том йӧзӧс. Сэтшӧм чукӧртчылӧмъяс вылын ас овмӧсас юралысь комсомолечьяслы индӧны ассьыныс муяссӧ Ленин ногӧн уджалысь том йӧз Союзын (ВЛКСМ-ын). Мед эськӧ ас овмӧсас юралысь комсомолечыс эз жӧ кеж бокӧ, мед эз сибды ас овмӧсас кокнас и юрнас, эз вунӧд дзикӧдз обществоса уджсӧ. Колӧ, мед сиктса ас овмӧсас юралысь комсомолеч нуӧдіс выль ногӧн, бура ассьыс овмӧссӧ да мед эз вунӧд тшӧтш обществоса уджсӧ: мед вӧлі кооперативъясын шленын, мед велӧдчис да босьтчис ӧтвылысь видз-му уджавны, вӧчис мукӧдтор.


Колӧ уджавны ӧтувтчӧмӧн.


Судзсьытӧм крестьянинлы ӧтнаслы зэв сьӧкыд ассьыс овмӧссӧ бурмӧдны. Кытчӧ эськӧ гӧль крестьяниныд эз кутчысь — ньӧбны ли машина, либӧ мӧс, вӧв, мыйкӧ мукӧдтор — ӧтнаслы сылы сьӧкыд. Ӧткӧннад бурджык да донаджык машинатӧ он вермы ньӧбны. Дай ӧтнадыдлы ичӧт овмӧсад гырысь машинасьыд нинӧм. Сы вӧсна и крестьянаыдлы колӧ ӧтувтчыны, видз-му уджалан кооперацияӧ шленӧ пырны. Сӧмын ӧтувтчӧмӧн кокниджыка да ӧдйӧджык вермасны крестьяна ассьыныс овмӧссӧ бурмӧдны.

Крестьяналы ӧтувтчыны позьӧ уна пӧлӧс кооперацияӧ. Медвойдӧр ёнджыка колӧ видзӧдлыны машинаяс судзӧдан да удждысян кооперативъяс вылӧ, ӧтвылысь видз-му уджалан артельяс вылӧ.


С. Ворсин.


Гижӧд
Комсомоллӧн могъясыс видз-му овмӧс кыпӧдан уджын
Йӧзӧдан во: 
Пасйӧд: 

Авторыс С. Ворсин

lkejrlkelkrgner klrjnelknfrkl ekjnrjkenfrej

1