КВАЙТ ВО КОМИ АВТОНОМИЯЛЫ


Важӧн сьӧкыд вӧлі овны ассикаса сёрниа йӧзлы. Найӧс озыръяс, ӧтув саркӧд, нэмысяньыс нартитісны, дзескӧдісны быд ногӧн, морттуйӧ эз пуктывны. Тайӧ лёк кадыс ӧні коли бӧрӧ. Дас во сайын Октябрса революция путкыльтіс став важ оласногсӧ. Быд аслас сёрниа йӧзлы Сӧвет власьт сетіс ӧткодь права. Сэсся Сӧвет власьт сетӧ ыджыд отсӧг овмӧс кыпӧдӧм вылӧ да велӧдчӧм вылӧ сэтшӧм йӧзлы, кодъяс кольӧмаӧсь бӧрӧ. Мед кокниджыка да ӧдйӧджык артмис выль олӧмыс, вермисны унджык уджалысь йӧз кутчысьны сӧвет уджас, быдсикаса сёрниа йӧзлы сетӧма права ас ногӧн овмӧдчыны, лӧсьӧдавны ассьыныс республикаяс, обласьтъяс.

Сэтшӧм правасӧ (автономия) квайт во сайын сетісны коми йӧзлы. Май витӧд лунӧ 1921 воын воссис коми йӧзлӧн автономия. Ас киӧн, ас мывкыдӧн, Ленин велӧдӧм серти, ми комияс, квайт во нин дорам выль олӧм. Коми йӧз тайӧ вояснас ёна водзӧ тувччисны.


КРЕСТЬЯНАЛӦН ОЛӦМЫС ВЕЖСЬӦ.


Войнаӧдз серти тӧдчӧмӧн бурмис, паськаліс миян видз-му уджалӧм. 1912 воын няньяс да пуктасъяс улын вӧлі 29.151 десятина, ӧні лыддьысьӧ — 32.135 десятина. Став докодыс видз-му уджалӧмысь да скӧт видзӧмысь ӧні унджык нин важ серти. Выль ног уджавны велӧдӧны агрономъяс. Колян во обласьт пасьта 11 вӧлӧсьтын вӧлі нуӧдӧма сель.-коз. курсъяс. Во чӧжӧн лои вӧчӧма 2.901 сёрни, 16 сель.-коз. выставка. Крестьяна муяс вылын вӧчӧма 217 видлӧг. 12 сюрс кӧзяйствоын муяс гӧрӧны нин плугъясӧн. Обласьт пасьта лыддьысьӧ 400 гырысь видз-му уджалан машинаяс. Кӧйдыс машинаясӧн весалӧма колян во 76.488 пуд. Бӧръя вояснас ӧти-мӧд крестьяна кутісны кӧдзны анькытш, турунъяс, мӧс вердан сёркни. 25 крестьяна уджалӧны уна переменаӧн нин.

Скӧт видзӧм сідзжӧ содӧ. 1924–25 воын мӧс лыд вӧлі 51 сюрс, 1925–26 воын лыддьысьӧ 73 сюрс юр. Колян во уджалісны 29 случнӧй пункт. 14-лаын вӧлі нуӧдӧма нормаяс серти скӧт вердӧм. Вӧвъяс 42 сюрссянь содӧмаӧсь 45.126-ӧдз. Вӧвтӧм-мӧстӧм олысьясыс чинӧны. 1924–25 воын вӧлі 13.653 вӧвтӧм олысь, ӧти вӧла — 27.201, кык вӧла — 1.425, куима — 68. 1925–26 воын вӧвтӧм олысь чинӧма 2.426 мында, ӧти вӧлаяс содӧмаӧсь — 2.918, кык вӧлаяс — 293. Сідзжӧ чинӧмаӧсь мӧстӧмъяс, да содӧмаӧсь ӧти-кык мӧска олысьяс. Дерт, тавося неурожай этша чинтіс скӧттӧ.

Крестьяна асьныс кутчысьӧны бурмӧдны овмӧссӧ кооперация пыр. Колян ар кежлӧ вӧлі лӧсӧдӧма быд нога 276 с.-коз. кооператив. Сэні бурджыкасӧ уджалӧны да отсасьӧны крестьяналы удждысян тӧвариществояс. Эм нин 55 машиннӧй, да 24 нюр косьтан т-во. Колян во вӧлі нюръяс косьтӧм вылӧ Центрсянь бюджетысь лэдзӧма 4.066 шайт, обласьтувса бюджетысь — 10.260 шайт.

Нажӧткаяс ӧні сідзжӧ кутісны содны. Мед кокниджыка колльӧдны тавося сьӧкыд кадсӧ, миян корӧм кузя Совнарком лэдзис отсӧг вылӧ 100 сюрс шайт. Тайӧ сьӧмыс мунас туйяс вӧчӧм да нюръяс косьтӧм вылӧ. Удж вылас медаласны гӧльджык крестьянасӧ. Миян обласьт уна вын пуктіс вӧр лэдзӧм лӧсьӧдӧм вылӧ. Колян во лои нин лэдзӧма керсӧ 17 прӧчент унджык войнаӧдз серти. Кер лэдзӧмысь крестьяна босьтісны 1925–26 воын 2.800 сюрс шайт. Таво лэдзӧма кер да шпал 795.615 куб. метр. План серти абу вермӧмаӧсь петкӧднысӧ. Вывті сёрӧн петісны уджавнысӧ, сэсся рабочӧйяс виччысисны ыджыд дон.


КУТШӦМА КЫПТӦ ПРОМЫШЛЕННОСЬТ.


Муным миян паськыд, озыр быдсяма бурторнас. Сӧмын важӧн нинӧм эз лӧсьӧдлыны, Коми мутӧ вӧлі эновтӧмаӧсь. Озыр йӧзыд волывлӧны вӧлі сӧмын тыртны ассьыныс зепъяссӧ. Зэв важӧн, коркӧ вӧчӧмаӧсь Нювчимса, Кажимса да Сереговса заводъяс. Миян обласьт эз эновт заводъяссӧ, сувтӧдіс кок йылас. Медбура уджаліс колян во Нювчимса завод. Сэні вӧчӧны чугуна кӧлуй. План серти, колӧ вӧлі вӧчны 491 тонна, вӧчисны 573 тонна. Серегов заводын сов вӧчӧм оз жӧ сет убыткасӧ. Сӧмын заводыс зэв нин важ да омӧль.

Сэсся миян обласьт тӧждысьӧ вӧчны выль заводъяс. Ӧнӧдз лои вӧчӧма: кер пилитан завод Сыктывдінкарын, лӧсьӧдӧма вӧр петкӧдысь фирмаяс — Печӧролес да Комилес. Кыкнаныс лоӧны обласьт кипод улын. Печӧраын стрӧитӧны ыджыд кер пилитан завод. Паськӧдісны удж тӧчила да зудъяс перъянінын. Паськӧдісны Сыктывдінкарса электростанция. Судзӧдісны центрысь уджӧн сьӧм чери кыйӧм лӧсьӧдӧм вылӧ. Стрӧитчӧ Якшинса шоссейнӧй туй, сійӧ ӧтлаӧдас Печӧраӧс Камакӧд. Уналаын лои сувтӧдӧма телеграф да телефон. Колян во обласьт пасьта лои стрӧитӧма 3 электростанция. Та кындзи стрӧитчӧны станцияяс: Човйын, Кылтовоын, Визинын.

Водзӧ кежлӧ, 15 вося план серти, лӧсьӧдӧма стрӧитны: замша вӧчан да консерв вӧчан заводъяс, Емваса косьяс вылын ыджыд гидроэлектростанция. Станцияыс кутас сетны донтӧм вын целлюлознӧй да бумага вӧчан пабрикаяслы. Сэні жӧ позьӧ лӧсьӧдны канифоль вӧчан завод. Сэсся ёна ковмас тӧждысьны туйяс вӧсна. Таво грунтӧвӧй туйяс лӧсьӧдӧм вылӧ местнӧй бюджетысь сетсьӧ 178 сюрс шайт. Ва туйяс ковмас жӧ бурмӧдны, медся нин Сыктыв да Эжва кузя. Ковмас ӧтлаӧдны Печӧра Камакӧд каналӧн, тӧждысьны ёна кӧрт туй стрӧитӧм йылысь. Сэсся дугдывтӧг лоӧ нуны тӧдмалан удж из шом да нерп петанінъясын. Тадзи вочасӧн кыпӧдам обласьтувса овмӧс.

1922–23 восянь миян бюджет воысь воӧ содӧ. Колян во вӧлі лӧсьӧдӧма обласьтувса бюджетсӧ 3.131 сюрс шайт мында. Лӧсьӧдӧм серти став докодыс локтӧма 92,4% мында. Тавося бюджет — 3.579.247 шайт. Налогъясысь локтӧ — 769 сюрс шайт, центрсянь отсӧг — 914 сюрс шайт, сэсся вӧр докодысь — 1.453 сюрс шайт. Мукӧд докодыс посниджыкӧсь. Бюджетысь овмӧс кыпӧдӧм вылӧ лӧсьӧдӧма сетны 897.985 шайт (25%), велӧдчан да дзоньвидзалун кутан удж лӧсьӧдӧм вылӧ — 1.675.788 шайт (46,8%).


ВЕЛӦДЧӦМ.


Революция миянӧс садьмӧдіс, петкӧдіс пемыд олӧмысь. Школаясын кутісны велӧдны выль ногӧн, комиӧн, шыбитісны сэні енмӧс да сарӧс. Ичӧт школаяс ӧні войнаӧдз серти унджык. Школаясын ӧні велӧдчӧны 77 прӧчентыс став челядь пиысь. Став посни школаыс — 487. Эм 11 челядь сад. Содіны и ыджыд школаяс. Коми обласьт пасьта лыддьысьӧ ӧні: 5 школа ІІ ст., 6 семилетка, 4 школа крестьяна том йӧзлӧн. Эм 1 педтехникум, 1 с.-хоз. техникум, 2 профтехшкола, 3 совпартшкола. Мукӧд гырысь каръясса ыджыд школаясын велӧдчӧны коми пиян — 300 морт гӧгӧр. Обласьт пасьта лӧсьӧдӧма 94 лыддьысян керка, 95 гырысьӧс велӧдан школа. Сӧвет власьт тӧждысьӧ сетны грамота быд мортлы.

Кутіс ньӧжйӧникӧн содны коми гижӧм, литература. Крестьяналы, „Коми сикт“-ысь ӧтдор петӧ журнал „Ордым“.

Дзоньвидзалун кутан удж автономия восьтӧм бӧрын сідзжӧ паськалі. 1921 воын вӧлі сӧмын 2 больнича, 3 доктор. Ӧні лои 15 больнича, 2 приемнӧй покой, 36 доктор, 90 пельшӧр, 37 акушерка. Локтан воын содӧ 8 больнича. Сыктывдінкарын восьтӧма туберкулёзнӧй да венерическӧй диспансеръяс.

Вермытӧм йӧзлы отсалӧм вылӧ колян во лэдзӧма сьӧм 59.560 шайт. Отсалӧма 572 мортлы. Таво сьӧмсӧ содтӧма 68% мында.


ВОДЗӦ КЕЖЛӦ УДЖЪЯС.


Важ ногӧн уджалӧмӧн крестьяналы пӧтӧса, бур олӧм дыр оз шед. Коми муын эськӧ позьӧ овны, бура овны. Сӧмын регыдджык колӧ вуджны выль туйӧ. Муястӧ вӧдитны колӧ заводитны уна переменаӧн, агрономъяс индалӧм серти. Скӧттӧ колӧ бурмӧдны, лӧсьӧдны бурджык рӧд, вердны норма серти, вӧчавны шоныд да югыд картаяс. Сэки йӧлыд, выйыд да куйӧдыд лоӧ унджык.

Му-видзтӧ юклӧма вывті посни торъясӧ. Колӧ кутчысьны косьтавны нюръяс, сиктъясын ӧдйӧджык нуӧдны видз-му лӧсьӧдан удж, ёнджыка вӧчавны ректасъяс, выль муяс, отсавны петны крестьяналы выль местаясӧ, обласьт пытшкӧ жӧ. Видз-му бурмӧдӧм вылӧ ковмас бюджетысь сетны унджык сьӧм. Сэсся крестьяналы вермас ыджыд отсӧг сетны кооперация, колӧ паськӧдны, ёнмӧдны сійӧс.

Мед став челядьсӧ вермим велӧдны, колӧ восьтавны ещӧ выль школаяс, бурджыка сэні пуктыны уджсӧ.

Квайтӧд обласьтувса съезд вынсьӧдіс стрӧитчан план 15 во кежлӧ. Тайӧ миян медыджыд удж. Артмас кӧ асланым промышленносьт, сэки миян олӧмыд помӧдз вежсяс, сэки крестьяналы оз ковмы судзсяна олӧм корсьны мунны Сибырӧ.

Бюджеттӧ ковмас водзӧ кыпӧдны. Центр вылад вывті надейтчыны оз ков. Асланым докодъясыс омӧля на сюрӧны. Прӧмысъяс да кер лэдзӧм паськӧдӧмӧн ковмас докодъяссӧ содтыны. Бюджетсьыс унджык сьӧмсӧ ковмас сетны овмӧс кыпӧдӧм да велӧдчӧм вылӧ.

Зэв ёна ковмас тӧждысьны тӧвар дон чинтӧм вӧсна. Ӧні донъясыс вывті на ыджыдӧсь.

Чорыдджыка колӧ нуӧдны учрежденньӧясын комиӧдан удж, паськӧдны коми литература.

Со кутшӧм гырысьджык уджъяс вылӧ ковмас бурджыка видзӧдлыны локтан воясӧ.


М.


Гижӧд
Квайт во Коми Автономиялы
Йӧзӧдан во: 

lkejrlkelkrgner klrjnelknfrkl ekjnrjkenfrej

1