КЫВЗЫ, КОДІ ПЕЛЯ


Ӧні миян кар улын озыр пӧлӧс йӧз ёна кутісны ылӧдлыны гӧгӧрвотӧм йӧзӧс быд ногӧн. Вот нӧ тіян ошкан Сӧветскӧй власьтыд кӧсйис война кусӧдны, а ӧні пӧ ёнджык воюйтӧны; кӧсйис пӧ нянь сетны, а кутім тшыглы кувны; кӧсйисны став свобода сетны, а ӧні пӧ плетьӧн кульӧны. Колӧ пӧ шыбитны Сӧветскӧй власьт и сетчыны белогвардейцылы. Эн веритӧй сэтшӧм йӧзлы, а сійӧ шуалысьяссӧ явитӧй Сӧветӧ.

Збыль ӧні чорыда война мунӧ, но мый понда мунӧ? Буржуй оз кӧсйы власьт сетны Сӧветлы, гӧль йӧзлы, и став выннас уськӧдчис миян вылӧ и кӧсйӧ бӧр босьтны ас улас, но ме думайта, кодлӧн неуна эм вежӧр юрас, оз окотитчы сетчыны бӧр сійӧ кабыр улӧ. Вот мый вӧсна ӧні мунӧ война. Няньысь дзескыд лои коми йӧзлы, но неужели миянӧс кӧсйӧ тшыглы вины Сӧветскӧй власьт? — Оз! Сӧветскӧй власьт кыдз вермӧ эськӧ старайтчӧ нянь вайны, но буржуй тупкӧ нянь туйсӧ и сійӧ кӧсйӧ миянӧс тшыгйӧдныс, а оз Сӧвет. Ме пӧ няня местасӧ ставсӧ босьта и тшыг йӧзыдлы пӧ быть лоӧ мен сетчыныс. Но ӧні белогвардейцыӧс Волгаысь коллялісны, Украйна надзӧник бӧр Сӧветскӧй власьт улӧ жӧ пырӧ, и нянь ӧні век вайӧны, но кӧрт туйяс слабӧсь и ӧдйӧ вайны оз вермыны. Ме ещӧ шуа, нянь понда оз ков Сӧветскӧй власьт вылӧ шуасьны, а ӧтвылысь миянлысь вир юысьяссӧ, буржуйяссӧ коллявны став няня местасьыс.

Тӧварышъяс! Эн видзӧдӧй кулакъяс небыд кыв вылӧ. Налӧн кывныс небыд, а чабырныс чорыд. Мый понда найӧ озырмисны? Ас труднаныс ӧмӧй? — Эз! Найӧ гӧрисны гӧль йӧзсӧ; гӧль йӧз пӧсьӧн овмӧссӧ чукӧртісны. Мыйла нӧ мыркӧдіс асывсянь войӧдз, нэмыс уджалас да оз озырмы? Сылы лоӧ ас весьтыс и кулак весьт уджавны. Ӧні кулакъяс радӧсь, мый гӧль йӧзлы татшӧм сьӧкыд пӧра лои, и мукӧд уджӧдӧ няньтӧм йӧзӧс кынӧмпӧт вылас. Кулакӧс озырмӧдӧмлы колӧ вӧчны пом. Эн жалитӧй кулакъясӧс, оз ӧд найӧ жалитны миянӧс.

Гижсялӧй быдӧн коммунист партияӧ и энӧ сетӧ власьтсӧ кулакъяслы. Энӧ видзӧдӧ сы вылӧ, кӧть кутшӧмкӧ коммунист олӧ лёк ногӧн, дзескӧдӧ уджалан йӧзӧс. Партия оз тшӧкты дзескӧдны уджалысьясӧс, а сэтшӧм лёк мортыс урсалӧ партиясӧ. Эн жалитӧй найӧ и коллялӧ партиясьыс.

Толькӧ чукӧртчӧмӧн, ӧтвывтчӧмӧн ми лоам ёнӧсь, а разі-пельӧн кӧ кутам овны, лёк лоӧ. Ӧти ньӧр тай ичӧт кага чегӧ, а унаӧс кӧ ӧтлаӧ кӧрталан, вӧчан рос (гӧлик), некутшӧм ён морт оз нин вермы чегны.


Гижӧд
Кывзы, коді пеля
Тема: 
Пасйӧд: 

гижысь: Лазар

lkejrlkelkrgner klrjnelknfrkl ekjnrjkenfrej

1