***

Выль во... Сьӧкыд вӧлі туйыс уджалысь йӧзлӧн. 1918 во чӧжыс муніс сійӧ пыр аслас нуӧдысьяс (вождьяс) бӧрсяыс. Быд боксянь сійӧс конъялісны, быд воськовын сійӧс паныдалісны. Быдласянь ылӧдлісны, быд ногыс повзьӧдлісны. Эз верит, эз повзьы уджалысь морт. Медбӧрын гӧль йӧзлысь вир юысьяс, сьӧд кырныш моз, уськӧдчисны уджалысь морт вылӧ. Вын-эбӧссӧ чукӧртіс уджалысь морт, воча сувтіс ыджыд кось вылӧ...

1918-ӧд во чӧж Россияса коньӧръяс косясисны буржуйяскӧд. Лунысь лунӧ Россияса уджалысь йӧзлӧн врагъяс (паныд сувтысьяс) содӧны. Но ещӧ ӧдйӧджык содӧны гӧль йӧзлы отсӧг сетысьяс, миян другъяс.

Уна вир вӧлі кольӧм во кисьтӧма коньӧръяслӧн да посни йӧзъяслӧн вӧлянысӧ перйигӧн. Сійӧ вир весьшӧрӧ оз вош. Сійӧ вирыс садьмӧдас, кось вылӧ сувтӧдас став Европаса, ставмувывса коньӧръяссӧ! Лэптісны нин гӧрд плаг Германияын, Австрияын, регыд и сэні чӧвтасны капиталӧс.

Кольӧм во кӧ косясисны буржуйяскӧд сӧмын Россияса коньӧръяс, тайӧ 1919 воӧ мед став Европаса, ставмувывса коньӧръяс ӧтвывтчасны, шыбитасны мышку йывсьыс “капитал” нима гундырӧс.

Выль во! Талун выль во лун став цивилизованнӧй му вылас! Выль вын-эбӧс уджалысьяслы! Мед лэптас гӧрд знамя ставмувывса уджалысь йӧз, капитал кабыр улысь мынтысяс!

Бур шуд уджалысь йӧзлы! Бур шуд да кузь нэм коми йӧзлы!