ДОЯР

«Ме мӧсъяс лысьта, —
Сиктса зон мен шуис, —
Геройскӧйӧн ог артав
Ассьым удж.
Эг казявлыв,
Мед коскӧ коркӧ сюйліс,
Эз вӧвлы кад,
Кор мыйкӧ ме эг куж.
Зэв ичӧтсянь на
Мӧсъяс дорын вӧлі:
Мам лысьтысис —
Тшӧтш сыкӧд ветлі пыр.
Ю, чайта, артмас
Уна вося йӧлысь...
И мамӧс пыдди пуктӧмыс
Оз быр.
Мен талун со
Геройлӧн шеді нимыс,
Кӧть менам уджысь
Оз на ловзьы шор.
Но олӧм визьӧ
Тайӧ сідзи инмис,
Мый вежны сійӧс
Зэв нин ӧні сёр.
Ас уджысь некор
Сералӧм эг кывлы.
Мен дояр кылыс
Зарниысь на бур.
И ошйыся ме
Радейтана нывлы,
Мый ме кодь дояр
Некысь мӧд оз сюр!»
Зон синъясысь ме аддза
Серам киньяс.
Збыль, тайӧ мортыс
Тӧдӧ ассьыс дон.
И кыпӧдӧны сійӧс
Шудлӧн гыяс...
Вот кутшӧм ветлӧ талун
Сиктса зон!