МУСЮР ПЕСЫСЬ

Шонді петтӧдз эновтӧ нин вольпась.
Рӧмыд на, а тракторыс оз узь.
Видз-му дорса уджалысьлӧн компас
Кисьыс тайӧ мортыслӧн оз усь.
Сійӧ талун арлыд оз на артав,
Пенсиялань мунан туй оз корсь,
Муяс вывті ветлӧ — сӧмын гартӧ,
Трактор вылын нуӧ быттьӧ кось.
Босьтӧм урожайӧн кӧть оз ошйысь
И оз ышнясь, мыйта гӧрис му,
«Мусюр песысь» ним тай сылы ӧшйис...
Мӧд ног некод сикт пасьта оз шу.
Сӧмын таысь некутшӧм ӧбида
Кутны сійӧ, тӧдӧмысь, оз куж.
Шулас сӧмын: мед пӧ кодкӧ видлас,
Кутшӧм пыдын мусюрыслӧн вуж.