ДУГДЫВТӦГ ВОСЬЛАВНЫ

Олӧмлысь кӧмкотсӧ чардбиӧн вурлӧма,
Туйяссӧ вевттьӧны гымалысь изъяс.
Дугдывтӧг восьлавны миянлы шуӧма,
Сьӧлӧмсянь пуктавны колана визьяс.
Шондіа дзирдъясӧн сувтӧны пасйӧдъяс,
Кыптӧны каръясӧн ӧтувъя мӧвпъяс.
Му шарсӧ мортыс, кыдз лӧсялӧ, пасьтӧдас,
Быдлаӧ павкнитас шобді му шӧвкъяс.
Некор ог копрасьӧй гудрасьысь кымӧрлы,
Бордъяссӧ кӧртавлам бушкола тӧвлысь.
Позьӧ морт бурлунӧн гӧраяс кыпӧдны,
Позьӧ морт сямлунӧн судзӧдны тӧлысь.
Быдлаын оланін лӧсьӧдам ӧтвылысь —
Миянлы му вылын абу на дзескыд:
Оз на ков вӧр-васӧ мырддявны пӧткалысь —
Кытчӧ тэд кажитчӧ, туйястӧ веськӧд.
Олӧмлысь кӧмкотсӧ чардбиӧн вурлӧма,
Туйяссӧ вевттьӧны гымалысь изъяс.
Дугдывтӧг восьлавны миянлы шуӧма,
Сьӧлӧмсянь пуктавны колана визьяс.