РӦДИНА

Ме корся образ аслам чужан мулы
Да петкӧдлыны кӧсъя мортлысь вын.
Бур отсасьысьӧн вӧзйысьӧ мен тулыс,
Дыр сылӧн мелі киясысь ог мын.

Тан олӧм, збыльысь, дзоридзьясӧн тыра,
Пӧсь уджын лов шы тулысыслӧн эм.
Быд оланінӧ гажлун ӧні пырӧ
И югдӧдӧ тшӧтш менсьым олан нэм.

Но ӧдйӧ вежсьӧ мукӧд кадӧн тулыс,
И образ ставнас сы помысь оз шед.
Ни гожӧмлӧн, ни арлӧн вына сюрӧс
Збыль колан серпас лӧсьӧдны оз сет.

Мен, гашкӧ, босьтны юяс, водопадъяс,
Зэв джуджыд гӧра, гыа море выв, —
Мед эськӧ збыльысь колан образ артмас,
Оз чусмӧд чужан муӧс менам кыв.

Но ставныс найӧ сетчӧмаӧсь мортлы
И виччысьӧны сысянь олан лад.
Морт шуӧм серти кыпавны и водны
Збыль ӧні налы воӧма нин кад.

Мен, гашкӧ, босьтны кодзув тыра енэж,
Лӧнь тӧлысь, югыд шонді, вильыш тӧв...
Но налысь мичсӧ, тӧда, бара венас
Бур мичыс миян уджлӧн уна пӧв.

Тадз тыдовтчӧ, мый Рӧдинаӧй ӧні
Став му выв мичсьыс колана да бур.
И ыджыд шудлун — овны меным сэні,
И сыкӧд сӧмын — ловъя менам юр.