ВЫЛЬ ПЫВСЯН

Пӧрысь мортлы пывсян йылысь
Сёрни панны лӧсьыд.
Би кодь корӧсь коссӧ сылысь
Веськӧдлас оз ӧтчыд.
Сійӧн чӧла мен оз овсьы.
Казьтыла выль пывсян.
Корӧсь улын ставыс ловзьӧ
Морӧссянь и мышсянь.
«Зэв тай ыджыд дивӧ — пывсян!» —
Гашкӧ, шуас кодкӧ.
Сӧмын тӧдан мӧй нӧ кысянь
Олӧм бурыс локтӧ.
Пывсяс врач, и скальпель сылӧн
Вундӧ да оз дойдав.
Пывсяс плӧтник — черыс сьылӧ,
Керка вевт оз войтав.
И художник бурджык краска
Аддзӧ пывсян бӧрын,
Быттьӧ сійӧ кыддза расті
Ветліс-муніс вӧрын.
Пывсян дорын мырсьысь мортӧс
Аттьӧавны кӧсъя,
Сылы удж вылас и гортас
Ыджыд бурлун вӧзъя.