ЗАРНИ АНЬ
Керка гӧгӧр дедлӧн Таг йӧр — енэж шӧрӧдз. Орччӧн ключ ва петӧ — Дзольгӧ йӧнӧд вӧрӧдз. Помӧдъяс ме вӧча, Кытчӧдз вын оз быр; Сэсся васӧ лэдза Кӧлесаяс пыр. Дед дорын бур рытӧ Дзормӧм тошкас дзебся. «Василейыс кытӧн, Кытчӧ бара лэбзис?» — Бабӧй менӧ корсьӧ. Сылы ме ог сюр. Дедӧй мекӧд ворсӧ, Вылын кутӧ юр. Ӧтчыд дедӧй шуӧ: «Коркӧ зэв нин важӧн Сюри войвыв муӧ Зарни Ань бур гажӧн... Лӧз вад яг выв чукйӧ Гуалӧмны сідз: Ыджыд ыргӧн кудйын, Мед оз вошты мич. Кодыр ыджыд лоан, Корсьны мунан, гашкӧ... Мыйӧн ягӧдз воан, Бурлань ышӧд асьтӧ. Зарни Аньыс дорӧ Лёкторйӧн эн пет, Ыргӧн кудсьыс торйӧд, Сылы кышан сет. Корсьны абу сьӧкыд Зарни Аньлысь гусӧ, Кӧть и вӧрыс тшӧкыд, Но оз сайӧд мусӧ. Сьӧкыд гортад нуны, Сьӧкыд видзны сэн, Лёктор вермас суны, Эновтас кӧ ен». Татшӧм сёрни-басни Лӧсьыда ме кывзі, Сьӧлӧм пиӧ пасйи Медся колан кывсӧ. «Зарни Аньсӧ аддза, Мый кӧть лоас мед», — Шуала да аддза, Нюмъялыштӧ дед. Вӧлі дасӧд ар мен — Пӧрысь дедӧй кувсис. Пыксис зэра ар нин, Лэптіс няйтсӧ увсьыс. Жалиті ме дедӧс, Шогси ёна дыр. Зарни Ань юр вемӧс Тӧвбыд гартіс пыр. Мыйӧн гожӧм воис, Эжва мыйӧн ямис, Лӧз вад дорӧ лоис Вуджавны мен Гамысь. Тывйӧн кыйис чери Батьӧй менам сэк. Муна зырйӧн, черӧн, Пу ни рос ог чег. Дедӧн казьтӧм места Регыдӧн и сюрис. Кодйыся, кыдз эшта, Мӧвпъяс вӧтла юрысь. Вот и ыргӧн кудлӧн Воссис сьӧкыд вевт. Зарни Ань сэн куйлӧ. Бокӧ син ог чӧвт. Зарни Аньыс мича, Шонді югӧр кытшын, Абу ёна ичӧт, Абу ёна ыджыд. Юр гӧгӧрыс гартчӧ Купальнича чвет. Ру кодь вӧсньыд платтьӧ — Чепӧльтны оз шед. Ӧмидз тыра тасьті Ӧтик киас сылӧн. Ур кучикысь паськӧм Кутӧ пельпом вылын. А мӧд киас видзӧ Кык алмаза ньӧв. Кӧмкотыс зэв ичӧт, Гартчӧ би кодь кӧв. Пола босьтны киӧ — Дзирдыс синмӧс ёрӧ. Аньыс аслас кылӧн Дінас быттьӧ корӧ. Ышловзи да босьті, Нопйӧ сюйи пыр. Сьӧлӧм костӧн-костӧн Доймис доза дыр. Вевтти ыргӧн кудсӧ, Муӧн тырті бура. Радлун ӧдва кутсьӧ, Кольмӧ весиг юрӧй. Бать дорӧ ме локта, Кыска сьӧкыд ноп. Батьӧй менам чотӧ — Вӧрзьӧдӧма кок. Гортӧ лоис мунны Весиг чери ловтӧг. Зарни Аньсӧ нуны Менам пельпом ёнтӧ. Колӧ Эжва вуджны — Потласьӧма пыж. Дзоньталім, кыдз кужим, Гартлім сира пыш. Гортын ломтім пывсян — Киссис изъя горйыс. Торксис миян мыссьӧм — Розяссьӧма ворйыс. Йирсянінысь мӧсным Мыйлакӧ эз лок... Код нӧ тадзи кӧсйӧ Вӧчны миян лёк?! Петі ӧшинь улӧ, Нопйӧс ассьым восьті. Шонді менӧ нюлӧ, Синва менсьым косьтӧ. Шуи: «Зарни Аньӧй, Муса югыд лун, Ловзьы бурӧн, шаньӧн, Лёк вылӧ эн мун. Мед жӧ мӧсным воас, Вӧрӧ оз жӧ вош. Сьӧкыд сытӧг лоас, Косявлас кӧ ош». Кылӧ мӧслӧн баксӧм. Сьӧлӧм чеччӧ скач: «Збыль мӧй Аньыс асьсӧ Петкӧдлӧ нин тадз?!» Быттьӧ вӧтын, мойдын Ставыс сэки вӧлі. Менӧ морт оз дойдышт, Быдӧн бур да мелі. Зарни Аньыс дорын Сӧмын сьыв да ов! Омӧльторйысь дорйӧ — Нинӧмысь эн пов! Садьми ӧтчыд войын. Унмӧй воши менам. Мый нӧ батькӧд лои? Коддзӧм юрыс венӧ. Дивӧ тайӧ вӧлі — Юсис менам бать! Пуксис, сэсся вӧлись Шуис меным тадз: «Зарни Аньтӧ тэнсьыд Вузалі ме донысь. Колӧкӧ, эн вензьы Мекӧд вывті ёнысь!» Видзӧда да шензя — Бӧрдӧ асъя вой. Кыдз нӧ батькӧд вензян — Кута сьӧлӧм дой. Ньӧбасьысьлӧн керка Сотчис лунъяс мысти. Кыдз кӧть морт эз бергав, Бурланьӧ эз письты. Шуис: «Зарни Аньӧс Вузавны мен кад!» Ньӧбысь мортӧс аддзис — Вывті вӧлі рад. Ньӧбысь мортлӧн мӧскыс Усис, вӧлыс пышйис. Аньсӧ йӧзлы вӧзйис... Ньӧбны — эз вӧв ышмысь. Сідзи эз и вузав, Вайис батьлы бӧр. Вӧч пӧ, мый тэ кужан, Гортад оз кӧ тӧр. Чудь гу перйысь кывлас Аньлӧн мичлун йылысь, Батьӧ дорӧ пырас, Ньӧбны корас сылысь. Сыкӧд бать оз сёрнит, Аньсӧ оз жӧ сет. Батьлӧн сьӧлӧм чорзис: Нинӧм пӧ ог тӧд! Чудь гу перйысь мырдӧн Кӧсйӧ Аньсӧ босьтны, Лӧз вад ягысь ыргӧн Кудсӧ тшӧктӧ восьтны. Батьӧй аслысныра — Нинӧмысь оз пов, Кытчӧ кӧсъяс, пырас, Мед кӧть воштас лов. Зарни Аньсӧ войнас Нуас мӧдлапӧлӧ, Ыргӧн куднас дзоньнас Вӧйтас лӧз вад шӧрӧ. Батьӧй мен эз восьты Мыжсӧ сэк жӧ пыр. Зарни Аньсӧ корси Ёнакодь на дыр. Коркӧ сэсся шуис: «Сьӧкыд сійӧс видзны. Зарни Аньлы туйыс Эз на талун вичмы. Гӧгӧрвоысь зонмӧс Виччысьлас мед сэн. Оз чин зарни доныс, Сімыс оз жӧ вен». Мыйта кӧть ме сэксянь Зарни Аньсӧ корси, Мӧдысь меным сэсся Сылӧн син эз воссьыв. Ог тӧд, кодлы сюрӧ Зарни Аньлань визь. Таысь менам юрӧй Оз нин талун вись.
Гижӧд
Зарни Ань
Жанр: 

lkejrlkelkrgner klrjnelknfrkl ekjnrjkenfrej

1