ПОДА ТУЙӦД

Пода туйӧд лунтыр муна,
Но ог аддзы сылысь пом.
Синсӧ шондіыс нин кунис,
Ори кыа дорлӧн сунис...
Кӧні бара узьлан чом?
Пемдіс. Восьлавны ог вермы.
Ошкӧн петкӧдчӧ сьӧд мыр.
Тӧда, татчӧ ме ог йӧрмы,
Кытчӧдз сьӧлӧм кутас вӧрны.
Норлун оз тай сӧмын быр.
Кокньыд вевттьӧд вӧча лыскысь,
Ӧзта бипур, пуа рок...
Кӧть и мудзӧй мулань кыскас,
Кӧть и унзіль менӧ личкас,
Сотчас биас менам шог.
Кӧнкӧ дивуйтчӧны кӧчьяс:
Кутшӧм тшын да кутшӧм би
Ӧшӧдчисны пемыд рӧчас?
Кутшӧм лёктор налы вӧчас
Вӧрӧ пырысьыслӧн ки?
Шытӧг, зыктӧг кывтӧ войыс,
Быттьӧ ньӧжмыд мудзӧм ю;
Тырыс кодзув сійӧ койис,
Ассьыс олӧм ас ног коллис,
Сывъяс босьтіс паськыд му.
Эг и тӧдлы, кыдзи шызис
Пӧтка горӧн югыд вӧр.
Быттьӧ шонді югӧр визьысь
Ставыс пузис, ставыс гызис —
Нинӧм некытчӧ оз тӧр.
Бара тэрмасигтыр водзӧ
Пода туйӧс тальны дась.
Со нин паськыд эрдыс воссьӧ,
Быттьӧ югыд биӧн сотчӧ...
Аддза корсянторйӧс тась!