БАТЬЛӦН ПОРТРЕТ

Зэв важӧн нин ӧшалӧ стенын
Стрӧг синъяса батьлӧн портрет
И быттьӧкӧ шуалӧ меным:
«Ме мыйлакӧ тэнӧ ог тӧд.
Мен кажитчӧ, водзті эг аддзыв,
Тась мунігӧн тані эн вӧв.
Кӧн чужин, кор воин тэ татчӧ,
И кодарсянь тӧлӧдіс тӧв?»
Ме висьтася, меным оз эскы
И некор оз куньлывлы син.
Кӧть асьсӧ нин дзебасӧ вешты,
А мӧд ног он, тыдалӧ, мын.
Кыдз кужа да верма, ме ола.
Дерт, сы серти лӧсьыдджык мен.
Кузь туйясысь ёнджыка пола
И, овлывлӧ, ӧтдорта вен.
Кор дӧзмышта, керкаысь пышъя,
Сэсь, надейтча, менӧ оз су,
Оз серав выль модаа кышан
Да янӧдан кывъяс оз шу.
Зэв важӧн нин ӧшалӧ стенын
Стрӧг синъяса батьлӧн портрет
И быттьӧкӧ шуалӧ меным:
«А мыйла ме тэнӧ ог тӧд?»