* * *

Юсьяслӧн кыпӧдчис стая, лэбзис — и енэжыс куш.
Зонсӧ ме радейта тайӧс, висьтавны сӧмын ог куж.
Дыр-ӧ нӧ виччысьны тэнӧ, дыр-ӧ он паныдась, зон?
Корсь талун ыб вылысь менӧ, висьтав мен, радейтан он?
Радейтчӧм — лэбалысь юсьяс. Радейтчӧм — шондіа лун.
Радейтчӧм дӧзьӧрит сюся, радейтчӧм дорйыны мун.
Усьӧны, усьӧны коръяс. Рудӧдӧ, рудӧдӧ му.
Муса кӧ зонмыдлы — корсяс. Абу кӧ — нинӧм он шу.
Шонді со вӧр сайӧ дзебсис. Паськӧдчӧ, паськӧдчӧ вой.
Кок улын коръясысь шебрас. Сьӧлӧмын пестысьӧ дой.