* * *

Зэв ыджыд кыдз ю вомӧн куйліс,
Кыдз улын гартчис сьӧдов ваыс.
Мог сэті вуджны менӧ суис,
И сьӧлӧм менам горшӧ кайис.

Но вӧчи воськов — вені полӧм,
И визув ваӧ инмысь йывсянь
Пыр водзӧ менӧ вӧтліс колӧм,
А вужйыс кыдзлӧн корис вывсянь.

Кӧть пола, тувчча зумыд кокӧн.
Ме улын ваыс пыр на джуджыд.
Тадз вуджа мӧдлапӧлӧ могӧн —
Сэн эрдыс паськыд, эрдыс югыд.

Но воис кад бӧр вуджны юсӧ.
Кыдз вужйыс увлань менӧ вӧтліс.
Эз вӧв мен поскыс тайӧ муса:
Код чӧрт тат меысь кындзи ветліс!

Ме воськов вӧчны весиг пола —
Кыдз пуыс кажитчӧ зэв вильыд.
Но мунны сэтчӧ, кӧні олан,
Быть мун, кӧть туйыд абу шыльыд.

Ог яндысь — пукси кыдз пу вылӧ
Да пуксӧн мӧді вуджны юсӧ:
Мед ог кӧть усь, да ва оз кылӧд —
Кок вӧзйысис на тальны мусӧ.