ГУАЛІГӦН
В. В. Поляковлы
Пыр котӧртыштін — чайтін, уджыд пышъяс. Кык уджач мортӧс вежны вӧлін дась. Но аслад уджӧн йӧз водзын эн ышнясь, эн пасьтав вылад дона кӧм ни пась. Пӧсь чардби корсин тэ картина вылӧ, быд вирдыштӧмысь босьтін югыд мич. Шог ойдӧдліс, но тэнсьыд шуд эз кылӧд. Тэ некор асьтӧ дзебасын эн видз. Збой челядь кокӧн котӧртісны вояс, лым чирйӧн вевттис дзорлун тэнсьыд юр. Эн мӧвпыштлы, мый сувтов вӧчны ковмас, мый коркӧ ломтас сьӧлӧмлы оз сюр. Пыр котӧртыштін — чайтін, пышъяс уджыд... А уджлӧн эз вӧв некӧн пом ни дор. Тэ куйлан — быттьӧ вывті ёна мудзин, и йӧзӧ петны быттьӧ зэв нин сёр. Ун босьтіс аслас небыд сывйӧ тэнӧ. Садь сетны ӧні некод оз нин куж. Горш гӧрддзассьӧ, да синва менӧ венӧ, пӧсь сьӧлӧм пытшкын быдмӧ шоглӧн вуж. Он некор сэсся восьтлы менсьым ӧдзӧс, он югдӧд нюмнад ассьыд чужӧмбан; он пасйы ловнад менсьым кывбур тэчас и мелі сёрни мекӧд он нин пан. Ас вылӧ кисьта чорыд изъя кывъяс: лёк мортлы мен эз тырмы кужанлун — мед менӧ эськӧ дона другӧй кывзіс да сьӧкыд туйӧд шойччытӧг эз мун... Мый тӧлкыс асьтӧ ыджыд другӧн шуны, он куж кӧ сетны ловъяыслы лов. Он ловзьӧд ни он сувтӧд водзӧ мунны. Весь сёрни тайӧ — другыдлы оз ков.
Гижӧд
Гуалігӧн
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1