ЭСКӦМ

Усьӧны дзирдалысь войтъяс, усьӧны ньӧжйӧник муӧ.
Кыаысь мичаджык мойдъяс вой тӧлыс лунвылӧ нуӧ.
Мойдъясысь унмовсис кыа, унмовсис вӧрыс и ваыс:
некӧні некод оз шыав — чӧв олӧ гӧгӧрбок ставыс.
Ӧтнам ме туй шӧрӧд муна, видзӧда войыслы синмас.
Мӧвпъясӧй чукӧрмис уна, сійӧн ме узьны ог инась.
Зэр ваӧн кӧсйылі усьны — мусӧ мед кӧтӧдны пыдӧдз.
Сӧмын тай вошті ме сюсьлун — нюжмаси кымӧръяс быртӧдз.
Мӧвпыштлі тӧв нырӧн лоны — мойдъясӧн гажӧдны олӧм.
Сӧмын тай сёрмӧдчи ёна — унмысь эг садьмы, кор колӧ.
Лӧсьӧдчи енэжын овны, сӧмын ме вильді да уси.
Босьтчылі кыаӧдз воны — кыаыс яналі, кусі.
Ветлӧдла ва дорӧд, вӧрӧд — таляла изъяс да нитшъяс.
Висьӧм кӧ дзикӧдз оз пӧрӧд — эска на, шудлун мен вичмас.