ДЗОРИДЗЬЯСА ВИДЗ

Ми ёрткӧд тӧрыт видзьяс вывті мунім,
и кутӧд миян радлӧмлы эз вӧв.
Эз вӧвлы быттьӧ весиг мудзӧм — вуні.
Пӧсь шонді пӧжис. Ывла оліс чӧв.

Тан гӧгӧр быдмӧ лӧзов рӧма турун —
кос шӧрӧдз миян муртса озджык во.
Том бордъя мӧвпъяс поздысьӧны юрын.
И кажитчӧ — бур кадлы пом оз ло.

Ме шуа ёртлы: «Кутшӧм мича виддзыс!
А дзоридзьяслы лыд ни тшӧт оз сюр!»
Но ёртӧй меным тадзи вочавидзис:
«Ме радуйтча, мый урожайыс бур.

Мен колӧ турун — мӧсъясӧс мед вердны,
рос чеглавны мед тӧв шӧрын эз ков;
мед эськӧ челядь йӧв вӧсна эз бӧрдны
дай тэ, бур другӧй, йӧвтӧг мед эн ов».

Ме бригадиркӧд вензьыны эг кӧсйы;
эг шу: «Мен дона дзоридзьяса видз».
Морт сьӧлӧмсяньыс буртор вӧчӧ йӧзлы,
и сылы мӧд ног воссьӧ видзлӧн мич.